طالبانو وویل چې واخان کې پاکستاني ځواکونه نشته او بل سراج الدین حقاني د چین له سفیر سره خبرې کړې دي
په بدخشان ولایت کې د طالبانو امنیه قومندانۍ په واخان ولسوالۍ کې د پاکستاني ځواکونو د شته والي ادعاوې بېبنسټه بللې دي.
په دغه ولایت کې د طالبانو د پولیسو ویاند احسانالله کامګار ویلي، چې په واخان کې تر دې دمه د پاکستاني پوځیانو د شته والي په اړه هېڅ راپور نه دی ترلاسه شوی.
تر دې وړاندې په خواله رسنیو کې داسې ګنګوسې خپرېدې، چې ګواکې د افغانستان واخان سیمه پاکستاني پوځ نیولې او یا یې نیسي او پاکستان غواړي چې د واخان سیمه د دغه هېواد برخه وګرځوي.
د طالبانو چمتوالی
خو احسانالله کامګار بیا ویلي، چې د دغې ډلې امنیتي ځواکونه په پوله کې د هر ډول بهرني ځواک پر وړاندې بشپړ چمتووالی لري.
د واخان او د افغانستان او پاکستان ترمنځ وروستیو ترینګلتیاوو په اړه د خوست پخواني والي حلیم فدایي پر اېکس پاڼه لیکلي: «په دې کار پاکستان هڅه کوي، چې نیابتي ملیشې جوړې او په خپله امنیتي خپلواکي کنټرول وساتي.»
له بل پلوه د پخواني ولسمشر حامد کرزي د دفتر رییس عبدالکریم خرم وايي، واخان ته لاسرسی او ترلاسه کول یې د پاکستان پخوانۍ هیله ده؛ خو په دې کې به هیڅکله بریالی نه شي.
نور ولولئ: چین کې د افغانستان سفارت: له چین سره د واخان لارې پر سوداګرۍ وغږېدو
نور ولولئ: د چین او افغانستان ترمنځ د باروړونکي اورګادي تګ راتګ پیلېدل
د چین له سفیر سره د سراج حقاني لیدنه
په کابل کې د چین سفیر جاو شینګ، د دوشنبې په ورځ د طالبانو د کورنیو چارو له سرپرست وزیر سراج الدین حقاني سره وکتل او د واخان دهلیز په شمول یې د دوه اړخیزو موضوعاتو په اړه خبرې وکړې.
د کورنیو چارو وزارت د خبرپاڼې له مخې، دواړو خواوو د واخان دهلیز ستراتیژیک اهمیت، د سوداګریزو اړیکو ښه کولو، او د مسافر وړونکو الوتنو د پراختیا په اړه خبرې وکړې.
دوی همداراز د دوه اړخیزو همکاریو د ژورتیا پر اهمیت ټینګار وکاوه او د ګډو ګټو د پرمختګ لپاره یې د عملي ګامونو د اخیستلو اړتیا څرګنده کړه.
له بلې خوا، په بدخشان ولایت کې طالب چارواکو په واخان ولسوالۍ کې د پاکستاني ځواکونو د شتون راپورونه رد کړل.
واخان دهلیز د افغانستان د بدخشان ولایت یوه تنګه سیمه ده چې افغانستان د چین له سنکیانګ سیمې سره نښلوي. دغه دهلیز د تاجکستان د ګورنو-بدخشان د خپلواکې سیمې او د پاکستان د خیبر پښتونخوا ایالت او ګلګت- بلتستان سیمې ترمنځ پروت دی.
ځینو پاکستاني چارواکو مخکې ویلي و چې پاکستان باید دا سیمه ونیسي چې له منځنۍ اسیا سره په مستقیم ډول وصل شي.
واخان دهلیز د افغانستان په بدخشان ولسوالۍ کې یوه ستراتیژیکه سیمه ده، چې افغانستان او چین د ځمکې له لارې سره نښلوي.
