طالبانو ۱۵ ورځې ورځې وروسته، نن پنجشنبه د یوې اعلامیې په خپرولو ومنله چې ایران پر پوله افغانان وژلي دي
ایران په کلګان سېمه کې پر افغانانو د ډزو د پېښې د څېړلو لپاره د طالبانو له لوري ټاکل شوي پلاوي دوه اونۍ وروسته ومنله چې، د ایران په کلګان کې پر افغانانو ډزې شوې دي.
د طالبانو مرستیال ویاند حمدالله فطرت د پنجشنبې په ورځ د (لړم ۱۰مه) د یوې خبر پاڼې په خپرولو سره ویلي، چې په ایران کې د افغانانو د وژل کېدو په اړه د دغې ډلې د کورنیو چارو وزارت د مرستیال ابراهیم صدر په مشرۍ د پلاوي څېړنې لا هم نه دي بشپړې شوې.
په پېښه کې افغانانو ته اوښتي مرګ ژوبله
په خپره شوې خبرپاڼه کې د ایران په کلګان سېمه کې پر افغانانو د چاودنې او ډزو پېښې منل شوې او زیاته کړې یې ده، چې په پېښه کې یو شمېر نورو افغانانو ته هم مرګ ژوبله اوښتې ده.
ښاغلی فطرت وايي، د پېښې د څېړنې پلاوي له لوري د پېښې له ځایه تر دې دمه دوه مړي او د یو شمېر ټپیانو په ګډون ۳۴ تنه نور افغانان افغانستان ته را لېږدول شوي دي.
نور ولولئ: ایران، پاکستان، چین او روسیې د افغانستان په اړه څلور اړخیزه ناسته وکړه
نور ولولئ: ایرانی قوماندان: افغانستان او پاکستان سره سرحد حتماً تړو
په خبرپاڼه کې لیکل شوي دي، چې په پېښه کې یو شمېر نور زیانمن شوي افغانان لا هم په ایران او پاکستان کې دي او طالب پلاوی یې د موندلو هڅه کوي.
حال وش د بشري حقونو سازمان چې د سیستان او بلوچستان په اړه راپورونه خپروي، په لومړي ځل یې د تلې میاشتې په ۲۲مه نېټه د ایران د پوله ساتو ځواکونو له لوري د افغانانو پر ۳۰۰ کسیزه ډله چې غوښتل یې ایران ته واوړي د ډزو خبر خپور کړ.
په راپور کې ویل شوي و، چې د ډزو په پایله کې لسګونه افغانان مړه او ټپیان شوي دي.
د طالبانو په باور تشې اوازې
خو هغه مهال د طالبانو ویاند ذبیح الله مجاهد پر خپله اېکس پاڼه لیکلي و، چې د ایران په پوله کې د افغانانو د وژل کېدو او ټپې کېدو په اړه دا تشې اوازې دي، «دا معلومات لا نه دي تایید شوي او د موضوع له روښانه کېدو وروسته به لازم تصمیم ونیول شي.»
طالبانو د اکټوبر میاشتې په ۱۶مه نېټه د یادې پېښې د څېړلو په موخه د کورنیو، بهرنیو او دفاع وزارتونو څخه یو ګډ پلاوی وټاکه، چې د پلاوي مشري د کورنیو چارو امنیتي معیین ته سپارل شوې وه.
خو ګڼ نیوکه کوونکي وایي، چې ابراهیم صدر ایران ته نږدې کس بلل کېږي او له همدې امله د دغو پلټنو پر پایلو هم زیات باور نه شي کولای.
