ذبیح الله مجاهد وايي چې امریکا د دوحې تړون نقض کړی او طالبان لا هم تر نړیوالو بندیزونو لاندې دي
د دوحې د تړون د څلورم تلین له پوره کېدو سره سم د طالبانو ویاند ذبیح الله مجاهد وايي، له امریکایانو سره د دوحې تړون د افغانانو د جهاد او قربانیو په پایله کې لاسلیک شو او د دغه تړون له لاسلیک وروسته په افغانستان کې د وینو توېیدو مخه ونیول شوه.
په دوحه کې د امریکا او طالبانو تر منځ تړون د ۲۰۲۰ میلادي کال د فبرورۍ په ۲۹مه لاسلیک شو.
د طالبانو په وینا له دوحې تړون د واشنګټن سرغړونه
د یاد تړون د څلورو کلونو له پوره کېدو وروسته د طالبانو ویاند ذبیح الله مجاهد وايي، امریکا د دوحې د تړون د یو شمېر مادو څخه امریکایي چارواکو سرغړونه کړې.
د طالبانو تر واک لاندې د افغانستان ملي راډیو د پنج شنبې په ورځ د (کب ۱۰مه) د دوحې تړون د څلورمې کلیزې په مناسبت د یادې ډلې د ویاند ذبیح الله مجاهد پیغام خپور کړی.
نور ولولئ: غني: د دوحې تړون یو ناورین و
نور ولولئ: امریکا: د دوحې تړون د طالبانو په ګټه او زموږ د متحدانو په زیان و
نوموړي په دغه پیغام کې ویلي، چې یاد تړون د افغانانو د قربانیو او جهاد په پایله کې لاسلیک شو او امریکا اړه شوه چې تر اوږدو خبرو وروسته یاد تړون ورسره لاسلیک کړي.
طالبان د دوحې تړون د وینو تویېدو مخه نیونکی بولي
ښاغلی مجاهد وايي، د دغه تړون تر لاسلیک وروسته په افغانستان کې د وینو توېیدو مخه ونیول شوه او موږ اوس د بشپړ امنیت خاوندان یو.
خو نوموړی د یاد پیغام په وروستۍ برخه کې ویلي چې، امریکا د یاد تړون ځینو مادو څخه سرغړونه کړې او لا هم پر افغانستان د امریکا له لوري بندیزونه دوام لري.
مجاهد وايي:«د دوحې د تړون د متن په تشریحاتو کې هغوی ژمنه کړې وه، چې له افغانستان سره به یې تعامل عادي وي، له افغانستان سره به ښې اړیکې لري او د افغانستان د پرمختګ مخنیوی به نه کوي؛ خو داسې نه دي شوي اوس هم تورلیستونه شته، بندیزونه په خپل ځای پاتې دي، د افغانستان د خلکو پیسې کنګل شوې دي او د رسمیت پېژندلو مخه هم نیول شوې ده.»
طالبنو د دوحې په تړون کې د نورو ژمنو تر څنګ په افغانستان کې د ټولشموله حکومت جوړول منلي و، خو دغه ډلې واک ته په رسېدو هغه ژمنې نه دي عملي کړي چې په دوحه کې یې له امریکا سره کړي وې.
