د پاکستان د پوځ مشر جنرال عاصم منير وایي: «مونږ د بدو قوتونو په ضد متحد يو او له دوښمن سره په اوسپنیزو لاسونو مقابله کوو.»
د پاکستان د پوځ د عامه اړیکو څانګې (ای اس پي ار) ویلي، چې د پوځ مشر جنرال عاصم منیر دا خبره پېښور ته د خپل سفر پر مهال د خیبر پښتونخوا د بېلابېلو سیاسي ګوندونو له مشرانو سره په لیدنه کې کړې ده.
نوموړي ويلي دي، چې د قوم د امن د خرابولو هر ډول هڅې ته به غاښ ماتوونکى ځواب ورکړي او د زیان رسولو توان به له منځه یوسي.
په دغه سفر کې د پاکستان پوځ مشر زیاته کړې ده: «موږ د امنیتي ځواکونو په لاسته راوړنو ویاړو. موږ په بریالیتوب سره د خپلو پولو دننه او بهر د ترهګرو سازمانونو عملیاتي وړتیاوې کمې کړې دي. پاکستاني ځواکونو د ترهګرو بنسټونه او د هغوی حجرې له منځه وړي دي. دا پیغام چې ترهګري زموږ په خاوره کې ځای نه لري او د ځواکونو هر عملیات د امنیتي ځواکونو د زړورتیا، مسلکيتوب او عملیاتي چمتووالي ثبوت دی.»
د پوځ د عامه اړیکو ادارې په دغه اعلامیه کې راغلي، چې ګډونوالو د ترهګرۍ د له منځه وړلو لپاره د سیاسي غږ او د خلکو د ملاتړ پر اړتیا موافقه وکړه.
دا په داسې حال کې ده، چې د پښتون ژغورنې غورځنګ (پي ټي ایم) بیا د پاکستان پوځ د ترهګرۍ په ملاتړ تورونوي.
همدا ډول په افغانستان کې تېر جمهوري حکومت هم وخت ناوخته د پاکستان پوځ د طالبانو په ملاتړ تورنولو او اوس تازه د طالبانو د بهرنیو چارو وزارت سیاسي مرستیال شېر محمد عباس ستانکري ته منسبوب په اېکس پاڼه لیکل شوي، چې په پاکستان کې د داعش ترهګرې ډلې د مرکزونو په تړاو ورسره ثبتونه شته او د دغه هېواد پوځ ورته روزنه ورکوي.
