علي وزیر د چمن پرلت کې له ګډون او وینا کولو وروسته د پاکستاني پولیسو لخوا نیول شوی
علي وزیر د چمن په پرلت کې د پاکستان په پوځي ادارو سختې نیوکې وکړې او ویې ویل چې د پاکستان پوځ د دواړو غاړو پښتانه تباه او برباد کړل. دوی یې له وطنه ورک کړل او لا هم اخته دی چې نور تباهي هم ورته راوړي.
دغه د پخوانۍ قامي اسمبلۍ غړی او د پښتون ژغورنې غورځنګ مخکښ غړی علي وزیر په ډېره اسماعیل خان کې د پولیسو لهخوا نیول شوی دی.
راپورونه وايي چې علي وزیر په داسې مهال نیول شوی، چې د چمن له پرلت څخه د ستنېدو په حال کې و.
علي وزیر او پر نظامي ادارو د هغه نیوکې
علي وزیر تېره ورځ د چمن په پرلت کې ګډون کړی و او په دغه پرلت کې د وینا پر مهال یې پر پاکستاني حکومت توندې نیوکې وکړې.
هغه وویل: «همدا پاکستان دی، چې افغانستان او پښتانه يې د مذهب په نوم تباه کړي دي.»
نور ولولئ: د چمن پرلت ګډونوال: د پاکستان پوځ مو د ډیورنډ کرښې ته نږدې جایدادونه غصب کړي
نور ولولئ: علي وزیر وايي پاکستان، افغانستان او پښتانه د مذهب په نوم برباد کړل
هغه د پاګستان د حکومت د هغې پرېکړې په غبرګون کې چې له دې وروسته به د چمن له لارې په پاسپورټ او ویزه تګ راتګ کېږي وویل:« پر سپین بولدک ـ چمن دروازه پاسپورټ نه منو او له افغان وطن څخه د پښتنو په زور اېستل او د هغوی کاروبار یرغمل کول د منلو نه دي.»
په دغه پرلت کې تر ګډون وروسته علي وزیر د درابن په سیمه کې د پولیسو لهخوا نیول شوي دی. د پاکستان پولیسو لا د هغه د نیولو په تړاو څه نه دي ویلي.
څو ورځې وړاندې محسن دوړ هم یاد پرلت ته نه و پرېښودل شوی
د بلوچستان پولیسو درې ورځې وړاندې په دغه پرلت کې د پخوانۍ قامي اسمبلۍ غړی او د ملي ډیموکراټیک ګوند مشر محسن داوړ د ګډون مخه هم نیولې وه او بېرته یې اسلام اباد ته ستون کړی و.
د محسن داوړ ترڅنګ د بلوچستان پولیسو د پښتون ژغورنې غورځنګ د نورو غړو مخه هم نیولې وه، چې غوښتل یې په دغه پرلت کې ګډون وکړي.
د پاکستان حکومت په دغه هېواد کې د ځینو ګونډونو مشران او غړي د چمن پرلت کې د ګډونو کولو له امله نئربند کړي هم دي.
د پښتون ژغورنې غورځنګ مشرانو ويلي، چې علي وزير د پوليسو لهخوا نامعلومه ځای ته لېږدول شوى دى.
علي وزیر تر دې وړاندې هم په ځلونو د پاکستاني پولیسو لهخوا نیول شوی و او یوه موده یې په زندان کې هم تېره کړې ده.
د یادونې وړ ده چې علي وزیر او د پي ټي ایم نور غړي بار بار نیول شوي او زندان ته اچول شوي دي چې ځینې یې لا اوس هم زنداني دي.
