اړوند خبرونه:
مارکو روبیو وايي، امریکا به د جي۲۰ هېوادونو غونډه کې ګډون ونه کړي
د هند لومړی وزیر وايي، جي۲۰ هېوادونو د افریقايي ټولنې دايمي غړیتوب منلی
کابل کې د ایران د ډیپلوماټیک استازولۍ سرپرست عليرضا د افغانستان او ایران ترمنځ د اقتصادي او کلتوري همکاریو د پراختیا پر اهمیت ټینګار کړی او په ایران کې مېشت د افغانستان د کډوالو رول یې د ایران په اقتصادي پرمختګ کې حیاتي ګڼلی دی.
ښاغلي بیګدلي، چې د دواړو هېوادونو ترمنځ د همکاریو د پروژو د څارلو لپاره هرات ښار ته سفر کړی و، د ایران او افغانستان کلتوري او اقتصادي اړیکې یې د «یو څپاند سیند» په څېر تشبیه کړې، چې د هغه په وینا، د دې بهیر د دوام لپاره باید موجود خنډونه په جدي او پرلهپسې ډول له منځه یوړل شي.
هغه زیاته کړه: «دا همکارۍ د ګډ تاریخ او کلتور پر بنسټ رامنځته شوې دي او د زرګونو کلونو په اوږدو کې یې دوام درلود. اوس د دواړو هېوادونو د مسئولینو او ډیپلوماټانو دنده ده چې دا میراث وساتي او وده ورکړي.»
د ملګرو ملتونو د احصائیو له مخې، ایران د نږدې څلورو میلیونو افغان کډوالو په مېلمهپالنه سره د نړۍ د کډوالو تر ټولو لوی کوربه هېوادونو له ډلې ګڼل کېږي.
که څه هم د ایران د کډوالۍ پالیسۍ په وروستیو کلونو کې تل له ستونزو سره مل وې. مخکې اسکندر مؤمني، د ایران د کورنیو چارو وزارت مرستیال، ویلي و چې د افغانستان د کډوالو بېرته ستنول د دې هېواد د برنامو په لومړیتوب کې دي.
