په جرمني کې له افغان خبریالانو د ملاتړ سازمان دویم سمپوزیم جوړ کړ

له افغان خبریالانو د ملاتړ سازمان (AJSO) وايي چې د دغه سازمان دویم سپموزیم د خبریالانو ملاتړو بنسټونو او د جلاوطنه او نړیوالو رسنیو د استازو په حضور کې جوړ شوی و.

دا سمپوزیم چې چهارشنبه د لیندۍ پر ۱۴مه د افغان جلاوطنه رسنیو د وضعیت ارزونې په موخه جوړ شوی و، په افغانستان کې رسنیو او د ازادۍ اوسني ناورین ته د نړیوالې پاملرنې د راکاږلو پر ارزښت، په افغانستان او درېیمو هېوادونو کې د افغان خبریالانو پر وړاندې پرتو ننګونو او په کور دننه د طالبانو تر واکمنۍ لاندې رسنیو پر وضعیت پکې خبرې شوې دي.

د بیان ازادۍ او موجودې ننګونې

له افغان خبریالانو د ملاتړ سازمان زیاته کړې چې دا سمپوزيم د افغانستان رسنيو او جلاوطنه خبريالانو پر وړاندې د پرتو ننګونو پر څيړلو، د بيان پر ازادۍ د هېواد د اوسنيو شرایطو د‌ اغېز او اطلاعاتو ته پر لاسرسي متمرکز و.

د ناستې ويناوالو د افغان خبريالانو او جلاوطنه رسنيو څخه د ملاتړو شبکو د رامنځته کولو پر ارزښت او د رسنيو، خبريالانو او نړيوالو بنسټونو ترمنځ د همکارۍ پر پياوړتيا ټينګار کړی دی.

نور ولولئ: طالبانو په خوست کې په راډیوګانو کې د نجونو پر ټیلیفوني اړیکو بندیز ولګاوه

نور ولولئ: طالبانو په خوست کې د «غرغښت» راډیو خپرونې بندې کړې

له خبریالانو د ملاتړ سازمان په اعلامیې کې راغلي: «په دې ناسته کې چې د جلاوطنه رسنیو ډېرو استازو پکې برخه اخیستې وه، د جلاوطنه رسنیو د اطلاع رسونې پر څرنګوالي، د جلاوطنه رسنیو پر اخلاقي کوډونو او د دغو رسنیو ترمنځ پر همغږۍ او پیوستون خبرې او بحث شوی دی.»

د نړیوالو پام راجلبول

د اعلامیې له مخې، د سمپوزيم ګډونوالو د دغه سازمان هڅې د جلاوطنو رسنیو تر منځ د پیوستون پیاوړتیا، د بیان ازادۍ او معلوماتو د ازادۍ وضعیت د ښه‌والي او د خبریالانو، د بیان ازادۍ او د هیواد نازک وضعیت ته د نړیوالو د پام اړولو لپاره مهمې بللې دي.

د یادونې ده چې پر افغانستان د طالبانو له بیاواکمنېدو وروسته لسګونو خبریالانو او د رسنیو مسوولانو د طالبانو د غچ اخیستنې له وېرې هېواد پرېښود.

پر دې سربېره باید یاده شي چې په افغانستان کې د رسنیو او خبریالانو وضعیت په ډېر سخت حالت کې دی او هره ورځ دغه رسنۍ د اوسني رژیم له خوا ګواښل کېږي.