دا لومړی ځل دی چې طالبان د پنجشیر د یاقوتو پر استخراج بریالي کېږي
دغه استخراج شوي یاقوت پر افغان سوداګرو پلورل شوي دي او نور یې د کرومایټو کانونو کې پانګونې ته رابللي دي.
پنجشېر کې د طالبانو د والي دفتر ويلي، چې په دې ولایت کې اول ځل یاقوت استخراج او په بولۍ کې پر کورنیو سوداګرو د زرو امریکايي ډالرو په ارزښت وپلورل شول.
اعلاميه زیاتوي، چې کورنيو سوداګرو د دوی له والي سره د کرومايټو ډبرو د قانوني استخراج په برخه کې د پانګونې غوښتنه هم کړې ده.
طالبانو تر دې مخکې په دغه ولایت کې د زمردو استخراج پیل کړې دی او نن یې هم دا ګرانبیه ډبرې پلورلې دي.
د پنجشیر زمرود
د پنجشېر لپاره د طالبانو د والي دفتر په يوه اعلامیه کې ويلي، چې د کانونو اړوند کمېټې نن په ۲۲مه بولۍ کې ۳۳ زره ۸۱۹ قيراطه زمرد په ۲ لکه ۶۹ زره ۵۵۰ امریکايي ډالرو په ارزښت پر کورنيو سوداګرو وپلورل.
اعلاميه زياتوي، چې یو شمېر بهرنيو پانګوالو هم د پنجشير د طالبانو له والي سره په ليدنه کې د کانونو په بېلابېلو برخو کې د پانګونې غوښتنه کړې ده.
نور ولولئ: اسلامي امارت د هېواد د اوسپنې کانونه داوطلبۍ ته وړاندې کوي
نور ولولئ: طالبانو د ۳.۵ میلیون ډالرو په ارزښت د پنجشیر زمرود پلورلي
تر دې وړاندي طالبانو ويلي، چې په تېر یوه کال کې یې له درې میلیونو ۶ لکه او ۲۹ زرو د زياتو ډالرو په ارزښت د پنجشېر څه باندې ۵۰ زره قیراطه زمرود پلورلي.
د طالبانو د کانونو وزارت د وروستیو شمېرو له مخې، په پنجشېر کې شاوخوا ۱۷۰۰ د زمرودو کانونه ثبت شوي چې ۵۵۰ کانونو ته د کار او فعالیت اجازه ورکړل شوې.
د کانونو نامسلکي کېدنې
نړېوال سازمانونه او شنونکي وايي، چې د طالبانو حکومت د افغانستان کانونه په نامسلکي او ناقانونه ډول پلټي او پلوري یې چې په دې سره ترلاسه شوې پیسې یې شخصي جیبونو ته ځي.
واک ته د طالبانو له رسېدو وروسته له افغانستان سره بهرنۍ مرستې کمې شوې، دغې ډلې د خپلو مالي اړتیاوو د پوره کولو لپاره د دوامدار عاید د یوې سرچینې په توګه د کانونو او قیمتي ډبرو په استخراج پانګونه وکړه.
د افغانستان د کانونو کېندنه او خرڅلاو د تېر افغان حکومت د چارواکو له سختو نیوکو سره مخ شوی دی. د افغانستان مخکني ولسمشر محمد اشرف غني ویلي وو چې د طالبانو له لوري د کانونو کېندنه مشروع نه ده او معلومه نه ده چې عواید یې چیرته ځي.
