د افغانستان لوی درستیز د پاکستان پوځ د لنډمهاله اوربند په ماتولو تورن کړ او خبرداری یې ورکړ چې د سرغړونو دوام به له قاطع او سخت ځواب سره مخ شي.
د افغانستان د ملي دفاع وزارت او لوی درستیز د پاکستان پوځ د لنډمهاله اوربند په ماتولو تورن کړ. د چارواکو په وینا، د اوربند د وخت له پېلېدو وروسته د پاکستاني ځواکونو د بریدونو له امله یو شمېر ملکي وګړي وژل شوي دي.
د هېواد د وسله والو ځواکونو لوی درستیز فصیحالدین فطرت د پنجشنبې په ورځ په یوه ځانګړي پیغام کې وویل چې دا اوربند د ملګرو هېوادونو په منځګړیتوب اعلان شوی او افغان ځواکونه ورته په بشپړه توګه ژمن دي.
د لوی درستیز خبرداری او د پاکستان بېباوري
خو د هغه په وینا، د ډیورند کرښې په اوږدو کې د پاکستاني ځواکونو له خوا د اوربند د ماتولو پېښې په وار وار لیدل شوې دي. لوی درستیز زیاته کړه چې حتی د کوچني اختر په لومړۍ ورځ (پنجشنبه/ د کب ۲۸مه) هم یو شمېر ملکي وګړي د دوی په بریدونو کې وژل شوي دي.
د دفاع وزارت دغه لوړپوړي مقام، یعنې لوی درستیز څرګنده کړه چې دا کړنې د پاکستان د پوځ «بېباوري او چلبازي» په ډاګه کوي. هغه ټینګار وکړ چې له دې سرغړونو سره سره، افغان ځواکونه تر اوسه اوربند ته ژمن پاتې شوي او هېڅ ډول غچ اخیستونکی اقدام یې نه دی کړی.
خو په ورته وخت کې، لوی درستیز یو کلک خبرداری هم ورکړ چې که دا ډول تېري او کړنې بیا تکرار شي، نو د اوربند دوام به بېمعنا شي او افغانستان به اړ شي چې د خپلې خاورې د دفاع لپاره «قاطع او سخت ځواب» ورکړي.
پر کونړ ولایت بریدونه او د لوی درستیز دریځ
بل لور ته، ځايي سرچینو راپور ورکړی چې پاکستاني ځواکونو د کونړ ولایت ځینې سیمې، په ځانګړي ډول د ناړۍ او مرورې ولسوالۍ، د توپونو په ګولیو ویشتي دي. د راپورونو له مخې، پاکستاني پوځیانو د چهارشنبې په ماښام او د پنجشنبې په سهار د کونړ ولایت په یادو دوو ولسوالیو کې بې رحمانه توپونه ویشتي دي.
دا پېښې او سرغړونې درې ورځې وروسته له هغه کېږي چې پاکستان په کابل کې د معتادانو پر یوه درملنیز مرکز خونړي هوايي بریدونه وکړل. د همدې وضعیت په غبرګون کې د هېواد لوی درستیز د خپلو ځواکونو د بشپړ چمتووالي خبره کړې ده. د یادولو ده چې د افغانستان او پاکستان ترمنځ د اختر په مناسبت دغه موقت اوربند د ترکیې، سعودي عربستان او قطر په غوښتنه او منځګړیتوب اعلان شوی و.
