مارشال دوستم ولسمشر غني سره په امنیتي وضعیت سلا مشورې کړي د ولسمشر غني پخواني لومړي مرستیال او جګړه مار «عبدالرشید دوستم» له اشرف غني سره لیدلي.
ښاغلي دوستم د هیواد د امنیتي وضعیت په اړه ورسره غږېدلی.له ارګ څخه په همدې تړاو خپره شوې اعلامیه کې راغلي، چې په دې لیدنه کې دواړو لورو د افغانستان په ځانګړي ډول د شمالي ولایتونو د وروستي امنیتي وضعیت په اړه خبرې وکړې او ټینګار وشو، چې له طالبانو سره د جګړې لپاره به د امنیتي ځواکونو ملاتړ کېږي او مشران به یو موټی کېږي.
ښاغلی دوستم داسې مهال له غني سره د امنیتي وضعیت په اړه غږېږي، چې په شمالي ولایتونو کې طالبانو تر بل هر وخت ډیر پوځي پرمختګونه کړي او تازه توانېدلي دي، چې د دوستم پلرنی ټاټوبی او د نوموړي د هستوګنې ځای «جوزجان» ولایت ونیسي.
تېره ورځ طالبانو په شبرغان کې د دوستم دفتر او د نوموړي کور تر خپلې ولکې لاندې راوست او د امنیه قومندانۍ او نورو تاسیساتو تر څنګ یې د یاد ولایت زندان هم نیولی او بندیان یې خلاص کړي.
باید یاده کړو چې د هېواد امنیتي وضعیت ډېر خراب دی او هره ورځ په لسګونو کسان خپل ژوند له لاسه ورکوي دوی هره ورځ د ژوند د خطر سره لاس او ګریوان وي.باید دا هم یاده کړو چې د افغانستان کندهار او هلمند ولایت کې ورځ تر بلې جنګونه زیاتیږي او عام وګړي ژوند له لاسه ورکوي.
