د روسیې ځانګړی استازی ضمیر کابلوف وايي، د ترهګرو ډلو له لېسته د طالبانو د ایستلو بهیر ګړندی روان دی
که څه هم د نورو هېوادونو په څېر روسیې هم د طالبانو واکمن رژیم په رسمیت نه دی پېژندلی، خو وايي، دغه ډله به ډېر ژر د ترهګرو له تور لېست وباسي او د سفر بندیزونه به ورباندې پای ته ورسوي.
تازه د افغانستان لپاره د روسیې ځانګړی استازی ضمیر کابلوف وایي، د روسیې د ترهګرو ډلو له نوملړه د طالبانو د نوم لرې کولو بهیر په ښه توګه روان دی او ډېر ژر به له تور لېست ووېستل شي.
له تور لېسته د طالبانو د وېستلو پړاوونه
ښاغلي کابلوف د تاس خبري اژانس سره په مرکه کې د دغې پوښتنې په ځواب کې چې څه وخت به طالبان د ترهګرو ډلو له نوملړه واېستل شي، وویل:«کله چې ټول پړاوونه بشپړ شي. لا هم په دې برخه کې کار دوام لري.»
تر دې وړاندې د افغانستان په چارو کې د روسیې د ولسمشر ځانګړي استازي ویلي و، چې د بهرنیو چارو او عدلیې وزارت ولادیمیر پوتین ته خبر ورکړی چې طالبان کولای شي د ممنوعه سازمانونو له نوملړه ووځي.
نور ولولئ: د مسکو فارمټ غونډه کې پر طالبانو نوي فشارونه
نور ولولئ: د مسکو فارمټ غونډه؛ طالبانو بیا د ټول ګډونه حکومت خبره رد کړه
نور ولولئ: ایران په افغانستان کې ټولشموله حکومت د حل لار بولي
د روسیې د بهرنیو چارو وزیر سرګي لاوروف ویلي، چې روسیه د دغه هېواد د ترهګریز سازمانونو له نوملړه د طالبانو نومونه باسي.
طالبان د ترهګرو ضد مبارزه کې د روسیې متحدین
طالبان له روسیې سره د ترهګرو ډلو په ځپلو او منځه وړلو کې د روسیې متحدین دي او ګډ کار ورسره کوي.
د روسیې ولسمشر ولادیمیر پوتین د شانګهای همکاریو ناستې په پای کې وویل، چې طالبان په افغانستان کې واک کنټرولوي او له دې اړخه هغوی « د ترهګرۍ پر وړاندې مبارزه کې زموږ متحدین دي.»
خو د طالبانو مخالفینو خبرداری ورکړی، چې د روسیې د ترهګرو ډلو له نوملړه د طالبانو اېستل به منځنۍ اسیا او نورو هېوادونو ته د ترهګرۍ د خورېدو په مانا وي.
هاخوا بیا تاجکستان او ازبکستان د افغانستان له شمالي ولایتونو د یادو هېوادونو د ناامنه کولو خبر ورکړی دی. دغه هېوادونه وايي، په شمالي ولایتونو کې داعش او نورې ډلې په پیاوړي کېدو دي او د بریدونو کولو توان تر لاسه کوي.
خو طالبان بیا د ګاونډیو هېوادونو دا ډول اندېښنې بې ځایه بولي او وايي، افغانستان کې داعش له منځه تللی دی او د بریدونو کولو توان نه لري.
