د ریاست الوزرا اقتصادي مرستیال ملا برادر اخوند هلمند کې د کجکي له لوی بند له نږدې لیدنه کړې ده
هاخوا پرون په ټولنیزه میډیا کې ځینې ویډیو خپرې شوې چې له ۹ کلونو وروسته د کجکي بند له اوبو ډک او په پرچاوه یې اوبه واوښتې.
خو نن د طالبانو د ریاستالوزرا اقتصادي مرستیال ملا عبدالغني برادر اخوند هلمند ولایت ته د سفر پر مهال له کجکي بند څخه لیدنه وکړه.
د کجکي بند پروژې له کارونو ستاینه
د نوموړي مطبوعاتي دفتر ویلي، چې ملا برادر د کجکي بند پروژې د مسولینو د ترسره شوو چارو ستاینه وکړه او هغوی ته یې د کارونو د لا ښه والي په موخه ځينې سپارښتنې وکړې.
نوموړي د کجکي بند پروژه ملي او حیاتي بللې او په دې برخه کې د رامنځته شویو نوښتونو له امله یې د مسولینو د هڅو قدردانی کړې ده.
نور ولولئ: ملابرادر:تېر یو کال کې اسلامي امارت هېوادوالو ته هیڅ یو قانع کوونکی کار نه دی کړی
نور ولولئ: هېواد کې د ملي تدارکاتو کمېسیون له لوري د ۲۵ پروژو منظوري
ملا عبدالغني برادر اخوند ویلي، چې وچکالۍ او په بندونو کې د اوبو کمښت له امله د برېښنا تولید کچه هم راټیټه شوې وه، خو سږ کال په هېواد کې د پرېمانه اورښتونو له امله د اوبو کچه لوړه شوې او د کجکي بند په څېر زیاتره بندونه له اوبو ډک شوي دي.
هغه زیاته کړې: له دې سره به په روان کې کال د کرنې برخه وده وکړي او هم به په هېواد کې دننه د برېښنا د تولید کچه لوړه شي.
د کجکي بند له لویو بندونو یو دی
د یادونې وړ ده، چې د کجکي بند د هېواد په کچه یو له لویو بندونو څخه دی، چې د هلمند ولایت په کجکي ولسوالۍ کې د هلمند پر سیند د موسمي سېلابونو د کنټرول، کرنیزو ځمکو خړوبولو او برېښنا د تولید په موخه جوړ شوی دی.
طالب چارواکي او له هغې ډلې ملا برادر اخوند وخت پر وخت د اوبو او برېښنا له هغو بندونو چې د جمهوري نظام پر مهال یې چارې پیل شوې وې، لیدنې کوي چې منتقدان یې له دغو پروژو په خپله ګټه د طالب مقاماتو تبلیغاتي استفاده بولي.
د طالبانو یو شمېر ستایونکي بیا د ورته پروژو د چارو د دوام لپاره د واکمن رژیم هڅې د پام وړ یادوي.
پر دې سربېره طالبانو د لویو جادو او سړکونو د جوړولو تر څنګ نور کارونه هم پیل کړي چې خلک یې ستاینه کوي، خو ورته وخت کې له طالبانو غواړي چې کیفیت ته هم پام وکړي.
