اړوند خبرونه:
عباس عراقچي: د افغان کډوالو د ستنېدو بهير به تدريجي وي
علیرضا بیګدلي: ایران کې افغان کډوال د دې هېواد په اقتصادي پرمختګ کې مهم رول لري
د ملګرو ملتونو د کډوالو عالي کمېشنري وايي چې د پاکستان حکومت د افغان کډوالو د داوطلبانه وتلو د ضربالاجل له پای ته رسېدو وروسته، تر دې دمه ۸۹۰۶ کسان ایستلي دي. په ورته وخت کې، د نړیوالې کډوالۍ سازمان ویلي چې په تېرو دوو ورځو کې ۸۰۲۵ افغان کډوال له پاکستانه ایستل شوي دي.
یاد سازمان د چهارشنبې په ورځ، د حمل ۲۰مه، په یوه اعلامیه کې ویلي چې د حمل له ۱۶مې نېټې راهیسې د افغان کډوالو د ایستلو بهیر په پاکستان کې په چټکۍ سره زیات شوی دی. دې سازمان ویلي چې په تېرو دوو ورځو کې له پاکستان ایستل شوي کډوال د اقامت اسناد نه درلودل یا د افغانستان د تابعیت کارتونه (ایسيسي) لرونکي وو.
د ملګرو ملتونو د کډوالو اداره همدارنګه د پاکستان په بېلابېلو ښارونو کې د کډوالو لپاره د لنډمهاله استوګنځایونو د جوړولو خبر ورکړی دی. دې ادارې زیاته کړې چې د افغان کډوالو د ایستلو دمخه په دې مرکزونو کې د هغوی پالنه کوي.
د پاکستان حکومت مخکې افغان کډوالو ته چې د اقامت اسناد نه لري یا د ایسيسي کارتونه لري، ضربالاجل ورکړی و چې تر مارچ ۳۱مې نېټې پورې دې هېواد پرېږدي. پاکستان همدارنګه خبرداری ورکړی و چې د ضربالاجل له پای ته رسېدو وروسته به دا ډله کډوال له ایستلو سره مخ شي.
