د طالبانو دغه لوړپوړی چارواکی وايي چې د نړۍ له لوري په رسمیت نه پېژندلو سره بیا هم ۳۸ هېوادونو کې استازولۍ لرو
د طالبانو د رییس الوزرا سیاسي مرستيال په لغمان کې يوې لوي غونډي ته وويل، چې که یې نړۍ په رسميت نه پېژنې؛ خو په ۳۸ هېوادونو کې سياسي څانګې لري او د ډېرو نورو هېوادونو سره یې د سوداګرۍ چارې روانې دي.
دغه چارواکي ويلي، چې وطن يې امن دی او نړۍ ته هم امن غواړي.
طالبان له نړۍ سره د تعامل غوښتونکي دي
د طالبانو د رییس الوزرا سیاسي مرستیال مولوي عبدالکبير سې شنبه لغمان ته تللی او هلته يې په يوې لویه ولسي او نظامي غونډه کې ويلي، چې د نړۍ سره تعامل او د خپل هېواد په څېر نورو هېوادونو ته امن غواړي.
هغه ويلي: « د نړۍ په ۳۸ ملکونو کې سياسي نمایندګۍ لرو، سیاسي اړيکي ورسره لرو، که په رسمیت مو څوک نه پېژنې؛ خو د سیاسي نماینده ګيو ترڅنګ مو تجارت هم روان دی.»
نور ولولئ: پر ګاونډیو هېوادونو د طالبانو غږ؛ افغان کډوال جبري مه راشړئ
نور ولولئ: مولوي کبیر په افغانستان کې د القاعده موجودیت رد کړ
نور ولولئ: پر امر بالمعروف د مولوي کبیر غږ: له خلکو سره نرمښت وکړئ
د طالبانو د دغه چارواکي په خبره، چې تېره شل کلنه مبارزه یې په هېواد کې د “اشغال” پر وړاندې وه او جمهوري نظام افغانانو ته د منلو نه وړ و.
هغه وویل: « ز موږ شل کلنه مبارزه د نظام د اشغال پر وړاندې وه، هغه نظام افغانانو ته د منلو نه و، زموږ د قربانیانو او شهیدانو ارمان پوره شوی دی، د تېر نظام مسوولینو او خلکو ته مو بخښنه کړې ده، اوس یو ارام او هوسا افغانستان غواړو.»
طالبان وايي، زموږ سیاست اقتصاد محوره دی
د هغه په ټکو چې سياست يې متوازن دی او د سالمي پاليسۍ له مخې ټول بندرونه د سوداګري پر مخ خلاص دي.
مولوي عبدالکبير د خپلو خبرو په يوه برخه کې وويل چاته اجازه نه ورکوي، چې د پرديو په مرسته په وطن کې ناامني جوړه کړي.
نوموړی وايي، چې د اړیکو د کمېسیون له لارې تر ۷۰۰ زيات افغانان، چې د منفي تبلغاتو له مخې له وطنه تللي بېرته راغلي دي.
د یادونې وړ ده چې طالبان سره له دې چې نړۍ یې په رسمیت نه پېژني او هره ورځ له نړۍ سره د تعامل هڅه هم کوي، خو د نړیوالو پر وړاندې یې د سیاست ژبه بې نظمه ده او داسې ښکاري چې طالب چارواکي په دې برخه کې یوه جامع تګلاره نه لري.
