د طالبانو د ریاست الوزراء سیاسي مرستیال له کورنیو او بهرنیو پانګوالو وغوښتل چې په افغانستان کې پر اوبو پانګونه وکړي
هاخوا پانګوال بیا وايي، د طالبانو رژیم کورنی او نړیوال مشروعیت نه لري، نو ځکه په ډاډه زده په افغانستان کې پانګونه نه شي کولی.
تازه د طالبانو د حکومت د ریاست الوزراء سیاسي مرستیال وايي، افغانستان د برښنا د صادروونکي هېواد له وړتیا برخمن دی؛ خو دا کار ندی شوی او د یو وارداتي هېواد په توګه پاتې دی.
له خطر سره د پانګې مخامخ کېدل
خو یو شمېر پانګوالو د نوم نه خپرولو پر شرط افغانناو خبري شبکې ته وویل، په افغانستان کې د طالبانو رژیم کورنی او بهرنی مشروعیت نه لري او نه هم د کوم ځانګړې اساسي قانون پر اساس قراردادونه کېږي، نو که چېرې دوی پانګونه کوي، نو په دې حالت کې یې پانګونه له خطر سره مخامخ کېږي.
مولوي عبدالکبير پرون دوشنبه د میزان ۹مه د افغانستان د برښنايي انرژۍ د پانګونې د فرصتونو په اړه جوړ شوي کنفرانس کې له کورنیو او بهرنیو پانګوالو وغوښتل، چې د افغانستان پر اوبو او برښنایي سرچینو پانګونه وکړي.
نور ولولئ: پر ګاونډیو هېوادونو د طالبانو غږ؛ افغان کډوال جبري مه راشړئ
نور ولولئ: مولوي کبیر د دوحې ۳مې ناستې راپور لا هم نه دی مطالعه کړی
په دې کنفرانس کې د طالبانو د ریاست الوزرا سیاسي مرستیال مولوي عبدالکبیر زیاته کړه، چې افغانستان د انرژۍ د تولید او له کورنیو سرچینو څخه د انرژۍ د تولید او صادرولو لوړ ظرفیت لري؛ خو په تېرو لسيزو کې په قصدي ډول د انرژۍ د واردونکي هېواد په توګه ساتل شوى دى.
د پروژو د عملي کولو توان
په ورته مهال د برښنا شرکت مسوولانو هم ویلي، چې په هېواد کې د ۵ میلیارډ ډالرو پر وړتیا د انرژۍ د تولید په برخه کې د پانګونې د پروژو دعملي کولو ظرفیت شتون لري.
عبدالباري عمر له دولتي ادارو او خلکو څخه د برښنا د لګښت د پورونو د ورکړې غوښتنه وکړه او وایي، چې له دې سره به وکولی شي خپل تخنیکي سیسټمونه لوړ او د ضایعاتو مخنیوي وکړي.
د برښنا نشتون بیا یوه داسې مسله ده، چې افغانان ورسره مخ دي.
اقتصاد پوهان وایي په کور دننه د برښنا د تولید لپاره ډېرې سرچینې شته؛ خو د دوی به وینا اوس هم د افغانستان د خلکو میلیونونه ډالره پانګه د بهرنیو هېوادونو جېبونو ته ځي.
له بلې خوا افغان پانګوال وايي، که د طالبانو رژیم په هېواد دننه او بهر سیاسي تضمین خپل کړي او په رسمیت وپېژندل شي، نو زیات شمېر پانګوال به خپله پانګه افغانستان ته انتقال کړي.
