مټیو میلر: له طالبانو سره د تعامل شرط افغان خاوره د نورو پرضد نه کارول دي
![afghan (66)](https://afghannow.net/wp-content/uploads/2024/07/Afghan-66-4-780x470.jpg)
د امریکا بهرنیو چارو وزارت وايي، له طالبانو سره تعامل شرط افغان خاوره د نورو پرضد نه کارول دي
د امریکا د بهرنیو چارو وزارت ویاند میټیو میلر وايي، له طالبانو سره په تعامل کې د سپینې ماڼۍ شرط دادی چې د افغانستان خاوره به د نورو پرضد نه کارول کېږي.
مټیو مېلر یو ځل بیا له طالبانو وغوښتل چې باوري کړي، د افغانستان خاوره د نورو هېوادونو پرضد نه کارېږي.
د اسلام اباد بار، بار ادعا
طالبانو له امریکا سره د دوحې تړون کې ژمنه کړې، چې بهرنیو وسلوالو ډلو ته په افغانستان کې ځای نه ور کوي او له افغان خاورې به نورو هېوادونو ته ګواښ نه پېښېږي.
خو د طالبانو واکمنېدو او پاکستان کې د وسلوالو بریدونو ډېرېدو سره اسلام اباد بیا بیا طالبان تورنوي چې د دغه هېواد ضد وسلوالو ته یې پنا ور کړې ده.
د تېرې دوشنبې په ورځ د پښتونخوا په بنو کې د پاکستان پر پوځي مرکز له برید او د اتو پاکستاني پوځیانو تر وژل کېدو وروسته د دغه هېواد بهرنیو چارو وزارت په اسلام اباد کې د طالبانو مرستیال سفیر احضار کړ.
نور ولولئ: جنرال مکېنزي له افغانستانه د امریکايي ځواکونو پر وتلو پښېماني ښودلي
نور ولولئ: د بریتانیا دفاع وزارت په افغانستان کې د خپلو ځواکونو جنګي جرمونه څېړي
نور ولولئ: د امریکا بهرنیو چارو وزیر له افغانستانه د امریکايي ځواکونو د وتلو پرېکړه سمه وبلل
پاکستاني چارواکو له نوموړي وغوښتل چې په دې برخه کې پلټنې وکړي او سملاسي ګام پورته کړي.
له توندلارۍ د پاکستانیانو زیانمنېدل
د امریکا د بهرنیو چارو وزارت ویاند هم وړمه ورځ په واشنګټن کې خبري غونډې ته وینا کې وویل، چې «د پاکستان خلک له ترهګرۍ او توندلارۍ ډېر زیانمن شوي دي.»
د مټیو مېلر په خبره، امریکا د سیمې له امنیت د ګواښونو ختمولو کې د پاکستان له حکومت او ولس سره ګډې ګټې لري.
هغه زیاته کړه، چې بیا بیا یې له افغان طالبانو د دې ډاډمنول غوښتي چې «په ترهګریزو بریدونو کې افغان خاوره نه کارېږي.»
مټیو مېلر زیاتوي «له طالبانو سره تعامل کې لومړیتوب یې هم دا و او دی چې افغان خاوره د نورو هېوادونو پرضد ونه کارېږي.»
طالبان تل دا وايي چې په افغانستان کې وسلوالې ډلې نشته او نه هم افغان خاوره د نورو هېوادونو پرضد د بریدونو لپاره کارېږي.
دوی د پاکستان حکومت د افغانستان پرضد د داعش په روزلو هم تورونوي، خو پاکستاني چارواکي ورته ادعاوې ردوي.
د یادونې وړ ده چې پاکستان په نړیوالو غونډو کې هڅه کوي تر څو افغانستان یو ځل بیا د ترهګرو ډلې د پټنځای په توګه معرفي کړي.