د کانګرس دغه لوړپوړی غړی وايي، کله چې امریکا افغانستان پرېښود، د داعش بهرني عملیات هم ډېر شوي دي
د امریکا ولسي جرګې د بهرنیو اړیکو د کمېټې مشر ویلي، چې د امریکا له وتلو او افغان حکومت له پرځېدو وروسته په «زرګونو ترهګر» له زندانه وتښتېدل چې په نورو هېوادونو کې د داعش په بریدونو کې مرسته کوي.
مککال وویل، «داعش ډله د مکسیکو له لارې امریکا ته دننه شوې.»
مایکل مککال د بایډن د ادارې پر سرحدي تګلارو نیوکه وکړه او دا یې د داعش په څېر ترهګرو ډلو ته یو چانس وباله چې پر امریکا بریدونه وکړي.
د ډونالډ ټرمپ ژمنه
جمهوري غوښتونکو په وار، وار پر ډیموکراټانو نیوکه کړې چې امریکا ته د لاتینې امریکا د کډوالو د ننوتلو مخه نه نیسي. ولسمشر ډونالډ ټرمپ ژمنه کړې چې که د نومبر په ټاکنو کې بریالی شي نو له مکسیکو سره به پر پوله دیوال جوړ کړي.
درېیو امریکايي چارواکو د چنګاښ په میاشت کې اینبيسي نیوز ته وویل چې له داعش سره تړلې د انساني قاچاق شبکې له منځنۍ اسیا او نورو ځایونو څخه تر ۴۰۰ زیات کډوال امریکا ته راوستي دي.
نور ولولئ: مایکل مککال دا له واقعیته لېرې بولي چې طالبان په سیمه کې د امریکا امنیتي شریکان دي
نور ولولئ: مککال افغانستان ته د امریکايي چارواکو سفر له افغانانو سره خیانت بولي
نور ولولئ: مککال: جوبایډن دې له طالبانو سره بندي امریکايي خوشي کولو ته لومړيتوب ورکړي
دوی ویلي چې پر روسیې د داعش وروستي برید د امریکا پر خاوره د دغې ډلې د بریدونو په اړه اندېښنې زیاتې کړې دي.
د ولسي جرګې د بهرنیو اړیکو د کمیټې مشر سيبيسي شبکې ته ویلي، چې د دوشنبې په ورځ یې یو مطلب خپور کړی او یو ځل بیا یې د پخواني افغان حکومت د پرځېدو د پایلو په اړه خبرداری ورکړی.
افغانستان کې له زندانونو د داعش وتل
هغه وویل: «موږ د افغانستان مخکیني حکومت پرځېدل ولېدل. په زرګونو داعش جنګیالي د بګرام له زندانه ووتل او بالاخره د افغانستان، تاجکستان او پاکستان په ځینو سیمو کې میشت شول.»
هغه زیاته کړه، «هغوی (د داعش خراسان څانګه) خپله لاره پرانیزي، دوی د مکسیکو له لارې متحده ایالاتو ته ننوځي.
مککال په متحده ایالاتو کې د داعش د اتو مشکوکو غړو نیول کیدو ته په اشارې سره وویل، «پوښتنه دا ده چې د دوی څومره نور کسان دلته (په متحده ایالاتو) کې دي.»
د متحده ایالاتو رسنیو راپور ورکړ چې اته تنه د تاجکستان وګړي د غبرګولي په ۲۲ په نیویارک، لاس انجلس او فلاډلفیا کې د داعش له خراسان څانګې سره د تړاو په تور ونیول شول.
تر دې مخکې د وري په میاشت کې د امریکا د کانګرس د بهرنیو اړیکو د کمیټې مشر له افغانستانه بهر د داعش د مخ پر ودې عملیاتي وړتیا په اړه اندیښنه څرګنده کړې وه.
مایکل مککال خبرداری ورکړ چې داعش اروپا او امریکا ته ګواښ دی.
