دغه افغان شتمن وايي چې افغانستان کې د کنسر یا سرطاني ناروغیو د درملنې روغتون جوړوي

افغان پانګوال میرویس عزیزي غواړي افغانستان کې د سرطاني ناروغیو درملنې یو پرمختللی روغتون، زېږنتون او د یتیمانو لپاره یو پالنځی جوړ کړي.

د عزیزي ګروپ مشر میرویس عزیز چې متحده عربي اماراتو کې یو له لویو پانګوال دی له بي بي سي سره ځانګړې مرکه کې افغانستان کې د خپلو مرستندویه کارونو په اړه غږیدلی.

عزیزي ګروپ تېره روژه میاشت کې له بې وزلو سره د مرستې لپاره د متحده عربي اماراتو د دولت له یوه پروګرام سره د لس میلیونه درهمو مرسته وکړه چې شاوخوا ۲۹ ملیونه ډالره کېږي.

د افغانستان لپاره د هغه پلان

د بي بي سي خبریال له نوموړي وپوښتل چې ډېرو تمه لرله چې داسې مرسته به افغانستان کې بې وزلو سره وکړي، ښاغلي عزیزي افغانستان کې له بې وزلو سره د خپلو کړو مرستو ته په اشارې سره وویل چې افغانستان کې د خیر ښیګڼې کارونو لپاره یې سل میلیونه ډالره ځانګړي کړي دي.

نور ولولئ: د تي سرطان په معلومولو کې د سپي مرسته

هغه وویل: ”زه افغانستان کې یو پروګرام لرم ، همدا اوس زموږ ډیزاینران پر هغه کار کوي، زه کابل ښار کې ۳۵۰ جریبه ځمکه لرم چې د طالبانو له راتګ وړاندې مې په ۲۵ میلیونه ډالر اخیستې وه، موږ غوښتل هلته ښارګوټی جوړ کړو، خو اوس هلته ښارګوټی نه جوړوو، زه غواړم هلته د سرطاني ناروغیو یو پرمختللی روغتون جوړ کړم چې د ناروغانو درملنه به پکې وړیا وي، زیږنتون او د یتیم پالنې مرکز چې لس زره یتیمان به په کې زدکړه کوي روغتیايي او نور خدمات به لري، هم جوړوم. د دې درې پروژو لپاره مې سل میلیونه ډالر بیل کړي، نو افغانستان مې له یاده نه دی وتلی. ”

په هېواد کې د سرطاني ناروغیو د درملنې روغتون نشته

افغانستان کې د سرطاني ناروغیو درملنې لپاره روغتون نشته او دې برخه کې شته خدمات په نشت حساب دي. دوه کاله وړاندې د افغانستان له سرطان سره د مبارزې بنسټ د بورډ مشرې نسرین اوریاخېل ویلي وو، د درملنې د امکاناتو او کافي معلوماتو نشتوالي له امله افغانستان کې د سرطان ۷۵ سلنه ناروغان مړه کېږي.

نوموړې د روغتیا نړیوال سازمان په حواله وویل هر کال افغانستان کې شل زره کسان په سرطان اخته کېږي چې ۱۵ زره پکې مړه کېږي.

په افغانستان کې تر ټولو ډېر د تیو سرطان دی، ورپسې د معدې سرطان دی چې ډېر کسان پرې اخته کېږي.

میرویس عزیزي په افغانستان کې د بانکدارۍ پر وضعیت هم خبرې کړې.

ښاغلی عزیزي په دې مرکه کې افغانستان کې د بانکونو پروضعیت هم غږېدلی او وايي، راتلونکو څو میاشتو کې به پر خلکو خپلې امانتې پیسې وسپاري.