رحماني او د هغوی زوی په دوبۍ کې د څه باندې ۱۵ میلیونه ډالرو په ارزښت جایداد پېرلی دی
د ولسي جرګې پخواني رئیس میر رحمان رحماني د جمهوریت پر مهال په قراردادونو کې ژور فساد وکړ چې له امله یې په لسګونه میلیونه ډالر تر لاسه او د سویس په بانکونو کې ذخیره کړل.
خو تازه د سازمان شويو جرمونو او فساد د راپور ورکولو پروژې په نوم یوې څېړنیزې شبکې په خپل راپور کې لیکلي، چې د ولسي جرګې پخواني مشر او د هغه زوی په دوبۍ کې د ۱۵.۲ مېلیونه ډالرو په ارزښت جایدادونه اخیستي دي.
له دغه جایداد ترلاسه کېدونکي عواید
د راپور له مخې، میر رحمان رحماني او اجمل رحماني هرکال مېلیونونه ډالر له دغه جایدادونو څخه ترلاسه کوي.
د دغه راپور پر بنسټ چې د سه شنبې په ورځ د ( غویي په ۲۵مه) خپور شو، په دوبۍ کې د رحماني او د زوی جایدادونو کې یې څو اپارتمانونه او څو پوړیزه ودانۍ شاملې دي.
نور ولولئ: دمریم سما او رحماني ناندرۍ
نور ولولئ: د امریکا خزانې وزارت د ولسي جرګې پخوانی مشر او زوی په مالي فساد ککړ بللي
د امریکا د بهرنیو چارو وزارت تېر کال په لېندۍ میاشت کې د افغانستان د ولسي جرګې د پخواني مشر او د هغه د زوی اجمل رحماني او هغوی پورې پر تړلو ۴۴ شرکتونو یې په اروپايي او اسیایي هېوادونو کې بندیزونه ولګول.
دغه وزارت دغه پلار او زوی تورن کړل، چې په افغانستان کې یې په «پراخه کچه مالي فساد» کې لاس لاره.
د دغې پرېکړې پر دوام، رحماني د امریکا د دولت پر ضد شکایت وکړ او دغه تورونه یې رد کړل.
د پېرل شوي جایداد اندازه
په دغه تازه څېړنیز راپور کې راغلي، لږ تر لږه د رحماني او د هغه زوی پورې تړلي دوه شرکتونه چې د امریکا د تحریمونو په نوملړ کې هم راغلي د دوبۍ د استوګنې په یوې سیمه کې دوی ۲۲۸ کورونه پېرلي دي.
د راپور له مخې، دغه جایدادونه په کلني ډول تر دوو مېلیونو ډېر ډالر لاسته راوړي.
د سازمان شويو جرمونو او فساد د راپور ورکولو پروژې دارنګه لیکلي، د دوی موندنې ښیي چې په افغانستان کې د امریکا د تدارکاتو په برخه کې لږ تر لږه درې تنو نورو قراردادیانو د ۲۰۰۱ کال څخه تر ۲۰۲۱ کاله پورې مېلیونونه ډالر تر لاسه کړي او په دوبۍ کې یې پرې جایدادونه اخیستي دي.
میر رحمان رحماني او د هغه زوی د نورو جنګسلارانو په څېر په افغانستان کې تر ټولو ډېر فساد کړی دی.
