ملګري ملتونه وايي چې افغانستان کې د بشري حقونو وضعیت اندېښمنوونکی دی
همدارنګه ملګروملتونو د بشري حقونو شورا یو ځل بیا په افغانستان کې په بشري وضعیت باندې اندیښنه ښودلې او د طالبانو د حکومت له خوا یې پلې شوې پالیسۍ په بشري حقونو یو سیستماتیک برید ګڼلی دی.
د بشري حقونو په برخه کې د ملګرو ملتونو عالي کمیشنر ولکر ترک، د بشري حقونو شورا غونډې ته په وینا کې په افغانستان کې د بشري حقونو د پاشل کیدو په اړه خبرداری ورکړ او ویې ویل، چې دغه وضعیت د میلیونونو افغانانو په ځانګړي ډول د ښځو او نجونو ژوند اغیزمن کړی دی.
نور ولولئ: ملګري ملتونه او بشر حقونه: طالبان دې د ښځو پر وړاندې تبعیضي چلند بس کړي
ښاغلي ترک وویل:” د ۲۰۲۱ کال د اګست د میاشتې وروسته د افغانستان قانوني او اداري چوکاټ د ژورو بدلونونوسره مخ شوی دی. د حکومت برحاله چارواکو ته ددې یادونه کوم، چې هغوی په افغانستان کې نړیوالو بشري وجایبو په برخه کې مسوولیت لري”.
په افغانستان کې له بشري حقونو سرغړونه
د ملګروملتونو ددغه چارواکي د وینا له مخې په افغانستان کې د بشري حقونو څخه سرغړونې کومه نوې خبره نه ده خو زیاته یې کړې ده، چې د طالبانو له خوا پلې شوې پالیسۍ په بشري حقونو باندې یو سیستماتیک برید دی.
ښاغلي ترک وویل:” د افغان میرمنو او نجونو ټکان ورکوونکي ځپل ډیر زیات ظالمانه دي… محدودیتونه مخ په زیاتیدونکي ډول سخت کیږي چې د ښځو او نجونو ازادۍ له منځه وړي او عملآ هغوی د خپلو کورونو دننه دیوالو کې ایسار وي او ورکوي یې”.
د ملګروملتونو د بشري حقونو د شورا ۵۴ غونډه د دوشنبې په ورځ پیل شوې ده. ددې غونډې په لومړۍ ورځ افغانستان لپاره ددغې شورا ځانګړي راپور ورکوونکي ریچارد بنیټ د طالبانو څخه د ښځو او نجونو پر وړاندې د پالیسۍ د بدلیدلو غوښتنه وکړه. ښاغلي بنیټ د ښځو او نجونو پر وړاندې د طالبانو پالیسۍ د بدبختۍ ډکې پالیسۍ وګڼلې.
نړیوال افغانان طالبانو ته وسپارل
د ریچارد بنیټ د وینا له مخې په دې وروستیو کې یې چې د کومو افغانانو سره خبرې کړي هغوی دا ګڼله چې نړیوالې ټولنې ورسره جفا کړې ده.
ښاغلي بنیټ وویل:” د دوو کلنو وروسته دا پوښتنه د ډیرو په ژبه په ځانګړي ډول د هغو افغانانو، چې د اوسني وضعیت سره مخالف دي داده چې ددې پر ځای چې مخ په خرابیدو د روان د وضعیت په غندنه اکتفا وشي، په ځانګړي ډول د نړیوالې ټولنې له خوا څه باید د وضعیت د بدلون لپاره ترسره شي، چې د یو محسوس بدلون سبب شي.”
نور ولولئ: د بشري حقونو د څار سازمان: طالبان د ښځو او نجونو په مجازات سره د بشريت ضد جرم کوي
د بشري حقونو د څار سازمان هم ویلي، چې افغانستان په نړۍ کې د بشري حقونو په برخه کې د یو ډیر سخت بحران سره مخ دی.
