د امریکا فضايي څېړنو اداره یا ناسا په سپوږمۍ کې د خپل نوي ماموریت پر مټ د بوټو د کرلو امکان لټوي

د نړۍ ساینسپوهان هڅه کوي چې په نورو سیارو کې د ژوند امکان څرګند کړي او راتلونکې نسلونو ته په دې برخه کې د نورو څېړنو امکان برابر کاندي.

سپوږمۍ ته د ناسا ارټیمیس ۳ ماموریت، چې ټاکل شوی په ۲۰۲۶ کې ترسره شي. دا ځل ساینس پوهان غواړي د سپوږمۍ جوړښت او تکامل په اړه پوه شي او په دې سیاره کې د انساني ژوند احتمال وڅېړي.

د سپوږمۍ خوځښتونه او زلزلې

اوس، ناسا ۳ ساینسي څېړنو را څرګندې کړي، چې له مخې یې ستورمزلي، سپوږمۍ ته د راتلونکي سفر پر مهال خپلې پلټنې کوي.

د څېړنې په یوه برخه کې ټاکل شوې چې ستورمزلي، د سپوږمې د خوځښتونو یا زلزلو او د سپوږمۍ په سطحه کې د اوبو یا یخ موندل وڅېړي او معلومه کړي چې ایا په سپوږمۍ کې د نباتاتو وده ممکنه ده که نه.

نور ولولئ:  ناسا له فضايي بېړۍ سره ستاسو نوم مشتري ته لېږي

نور ولولئ: ناسا د سپوږمۍ پر سطحه د چندریان-۳ انځورونه خپاره کړي

نور ولولئ: ناسا د سمندرونو او اتموسفیر د مطالعې په موخه سپوږمکۍ فضا ته وتوغوله

سپوږمۍ ته د ارټیمیس ماموریت کې درې پروژې شاملې دي، چې د امریکا د فضايي ادارې (ناسا) لخوا پلان شوي.

د ارټیمیس د دغو ماموریتونو موخه د سپوږمۍ په اړه د لا زیاتو معلوماتو ترلاسه کول دي او هیله من دي چې په ۲۰۲۶ کال کې به تر ۵۰ کلونو وروسته انسانان یو ځل بیا پر سپوږمۍ قدم کېږدي.

د ژوند امکانات او د بوټو کرلو ازموینه

ناسا به په ۲۰۲۵ کې د دویم ماموریت، لپاره فضا ته ستورمزلي واستوي، چې د سپوږمۍ شاوخوا الوتنې وکړي او ځمکې ته راستانه شي.

وروستی ماموریت یا ارټیمیس ۳، چې اټکل کېږي د ۲۰۲۶ کال په شاوخوا کې ترسره شي او ۳۰ ورځې به دوام وکړي، ستورمزلي به ځمکې ته له راستنیدو مخکې د سپوږمۍ په مدار کې ژوند وکړي او د څېړنو لپاره به څو ځله د سپوږمۍ سطحې ته لاړ شي.

ټاکل شوې ستورمزلي د ارټیمیس ۳ ماموریت پر مهال درې څېړنې ترسره کړي:

د سپوږمۍ د چاپېریال څارنې سټیشن چې په زلزله سنج مجهز دی. هغه وسیله چې ساینس پوهان یې په سپوږمۍ کې د زلزلې اندازه کولو لپاره کاروي او د سپوږمۍ د رامنځته کېدو او نور معلومات ترې ترلاسه کوي.

د بوټو پر کښت د سپوږمۍ اغېزه، چې د سپوږمۍ پر سطحه د بوټو د کرلو امکاناتو په اړه څېړنه کوي او د سپوږمۍ د رڼا او فضا اغیزې ګوري.