دغه مشاعره هر کال د پسرلي په راتلو او پر ننګرهار د نارنج ګل د ښایسته ګلانو د خواږه بوی د خپرېدو په وخت کې جوړېږي.
دا مشاعره چې پرون ماسپښین دوه بجې پیل شوه، د شپې تر ناوخته یې دوام درلود.
ننګرهار کې د طالبانو د اطلاعاتو کلتور مسوولان افغانناو ته وایي، په مشاعره کې سږ کال هم زرګونه هېوادوالو، طالب مسوولانو او شاعرانو ګډون کړی وو.
د ننګرهار د اطلاعاتو او کلتور رییس وايي، چې په مشاعره کې د کوزې پښتونخوا شاعرانو او مینوالو هم ګډون کړی وو.
د مشاعرې ګډونوال او فرهنګیان بیا دا مشاعره د هېواد د کلتور ژوندي ساتلو ترڅنګ د هېوادوالو د یووالي یو مهم سمبول هم بولي، خو ټینګار کوي چې په مشاعره کې باید شاعران په خپل زړه شعر ویلو ته پرېښودل شي.
یوه شاعر د نوم نه خپراوي په شرط وویل، چې سږنۍ مشاعره هم یواځې هغو شعرونو ته ځانګړې وه چې د طالبانو د حکومت ملاتړي وو.
دی هیله لري چې دا ډول ملي مشاعرې دي راتلونکي کې د انحصار له بنده خلاصې ترسره شي، څو بېرته پخوانی رنګ او خوند خپل کړي.
