اړوند خبرونه:
UNHRC د بشري حقونو په برخه کې د متحده عربي اماراتو موقف وستایه
د متحده عربي اماراتو خواخوږي؛ له زلزله ځپلو سره یې بېړنۍ مرسته وکړه
متحده عربي اماراتو کې له افغان مشرانو او سوداګرو سره د ټوماس وېسټ لیده کاته
د عمان په کوربهتوب د ایران او امریکا ترمنځ د لوړې کچې خبرېاترې نن (شنبه، د وري ۲۳مه) په مسقط کې پیل کېږي. د دغو خبرواترو موخه د ایران د اټومي پروګرام پورې اړوند مسلو څېړل او د سیمهییزو تاوتریخوالي کمول دي.
د سپوتنیک خبري اژانس د راپور له مخې، د منځني ختیځ لپاره د ډونالډ ټرمپ ځانګړی استازی او د امریکايي پلاوي مشر سټیف ویتاک د ایراني پلاوي سره د خبرواترو لپاره د عمان پلازمینې مسقط ته رسېدلی دی.
په ورته وخت کې، د ایران د بهرنیو چارو وزیر او د ایراني پلاوي مشر، سید عباس عراقچي هم نن سهار عمان ته لاړ، او د تسنیم خبري اژانس د راپور له مخې، د هغه الوتکه څو دقیقې وړاندې په مسقط کې ښکته شوه.
د رویټرز د راپور له مخې، د ایران د اسلامي جمهوریت ستر مشر علي خامنهای، عراقچي ته د خبرواترو د پرمخ بیولو بشپړ واک ورکړی دی. رویټرز د باخبره سرچینو په حواله راپور ورکړی چې “د خبرواترو موده، یوازې د اټومي مسلې په اړه به وي، او د امریکایي لوري په جديت او نیک نیت پورې اړه لري.”
دا خبرېاترې په داسې حال کې پیل کیږي چې د ایران او امریکا ترمنځ تاوتریخوالی په وروستیو میاشتو کې د ایران د اټومي پروګرام او د واشنګټن لخوا لګول شویو بندیزونو په اړه د کړکیچ له امله زیات شوی دی.
د امریکا ولسمشر ډونالډ ټرمپ مخکې ګواښ کړی و چې که کومه هوکړې ته ونه رسېدو، نو پر پوځي اقدام به غور وکړي. خو ایران د دې خبرواترو په غیر مستقیم ماهیت ټینګار کړی او ویلي یې دي چې تر هغه چې د “اعظمي فشار” او ګواښونو پالیسي دوام ولري، مستقیمې خبرېاترې به ممکنه نه وي.
عراقچي مخکې په ایکس ټولنیز شبکه کې دا مذاکرات د متحده ایالاتو لپاره د “فرصت او ازموینې” په توګه بیان کړي وو، او ویلي یې وو چې د خبرواترو پایله د بل لوري په جديت او ارادې پورې اړه لري. هغه همدارنګه ټینګار وکړ چې ایران په دې خبرواترو کې د عادلانه پایلو د ترلاسه کولو لپاره د جدي هوډ سره داخلیږي.
له بلې خوا د ایران متحدین چین او روسیې د دې خبرواترو هرکلی کړی دی. کرملین ویلي چې دا خبرېاترې کولی شي د تاوتریخوالي کمولو لامل شي، او چین پر امریکا غږ کړی چې په خبرو اترو کې “صادق” وي. اروپايي ټولنې هم دا خبرېاترې د ایران د اټومي مسلې د ډیپلوماتیک حل په لور یو ګام ګڼلی دی.
