اړوند خبرونه:
طالبان ډونالډ ټرمپ ته؛ د افغانستان بانګ د ۹ میلیارده کانګل شتمني راته ازاد کړئ
د هند بهرنیو چارو وزارت: کابل ته تللی پلاوی پر اقتصادي اړیکو غږېدلی
د هند د بهرنیو چارو وزارت ویاند راندهیر جیسوال وايي، هېواد یې هڅه کوي چې له طالبانو او افغان ولس سره خپلې اړیکې پیاوړې کړي.
هندي رسنیو شنبه د مرغومې پر ۲۹مه، راپور ورکړی چې جیسوال دا څرګندونې د یو مطبوعاتي کنفرانس پرمهال مطرح کړي او د طالبانو د بهرنیو چارو وزارت سرپرست امیرخان متقي او د هند د بهرنیو چارو وزارت مرستیال ترمنځ وروستۍ لیدنه یې د «لوړې کچې تعامل» بللی دی.
هغه زیاته کړې چې هند به له افغانستان سره د ورزش او بشرپاله مرستو د زیاتوالي په برخه کې همکاري وکړي.
په راپور کې د جیسوال په حواله راغلي دي: «موږ دا روښانه کړې چې غواړو له افغان ولس او دولت [طالبانو] سره ډیرې بشري مرستې او همداراز د پراختیا په برخه کې همکاري وکړو.»
د هند د بهرنیو چارو وزارت همداراز زیاته کړې چې نوی ډیلي غواړي له افغانستان سره خپلې اوږدمهاله اړیکې روانې وساتي.
ورته مهال، هندي رسنیو د لشکر طیبه او حزبالله محمد په ګډون په افغانستان کې د پاکستان د ترهګرو ډلو حضور د نوي ډیلي لپاره د اندېښنې وړ بللی دی.
دا په داسې حال کې ده چې په دې وروستیو کې د هند او طالبانو ترمنځ تعامل ډېر شوی او څه موده مخکې د دغه هېواد د بهرنیو چارو وزارت مرستیال په متحده عربي اماراتو کې له امیرخان متقي سره ولیدل.
طالبانو دا لیدنه رغنده بللې او زیاته کړې یې ده چې دا ډله له هند سره د ډیپلوماتیکو اړیکو د پراختیا په لټه کې ده.
