د ټرمپ له لوري د اوربند تر اعلان وروسته، نړیوال بازار کې د تېلو بیې ۱۳ سلنه راټیټې شوې او د یو بېرل بیه ۹۴ ډالرو ته راښکته شوه. په نړیوالو بازارونو کې د تېلو د بیو د بدلون جزیات دلته ولولئ.
په وروستیو ساعتونو کې په بې ساري ډول په نړیوال بازار کې د تېلو بیې راټیټې شوې دي. دا بدلون وروسته له هغې رامنځته شو چې د امریکا ولسمشر ډونلډ ټرمپ د ایران او امریکا ترمنځ د دوو اونیو مشروط اوربند اعلان وکړ. دغه خبر نه یوازې سیاسي کړکېچ کم کړی، بلکې د تېلو په نړیوال قیمت یې هم مستقیمه او ژوره اغېزه کړې ده.
په نړیوال مارکېټ کې د تېلو د بیې د کمېدو ارقام
د رسنیو د راپورونو له مخې، په نړیوال بازار کې د تېلو بیې د پام وړ کمې شوې او لا هم د راټیټېدو په حال کې دي. دمګړۍ د یو بېرل خامو تېلو بیه شاوخوا ۱۳ سلنه راټیټه شوې او نږدې ۹۴ ډالرو ته رسېدلې ده. دا په داسې حال کې ده چې یوازې تېره سې شنبه د یو بېرل تېلو بیه ۱۰۰ ډالره وه، خو د اوربند خبرې د قیمتونو دا ګراف په چټکۍ سره راکوز کړ.
همدارنګه د امریکا د خامو تېلو بیه هم شاوخوا ۱۴ سلنه ټیټه شوې ده. دا بې سارې ټیټوالی ښيي چې په نړیوال بازار کې د تېلو بیې د منځني ختیځ تر امنیتي وضعیت او د امریکا تر سیاستونو پورې څومره تړلې دي.
د اوربند شالید او نړیوال غبرګونونه
د ایران او امریکا ترمنځ د دوو اونیو اوربند له پرېکړې څخه ګڼو هېوادونو او نړیوالو سازمانونو هرکلی کړی دی. دغه هوکړه وروسته له هغې وشوه چې پرون ټرمپ ایران ته د بشپړې ویجاړۍ سخت ګواښ وکړ، مګر د ایران له لوري د مقاومت او ډیپلوماټیکو هڅو وروسته دواړه لوري مشروط اوربند ته ورسېدل.
اقتصادي کارپوهان په دې باور دي چې که دغه اوربند په یوه تلپاتې سوله بدل شي، نو په نړیوال بازار کې د تېلو بیې به نورې هم عادي حالت ته راوګرځي، چې دا د نړیوال اقتصاد د ثبات او د انفلاسیون د کنټرول لپاره یو ډېر مثبت ګام دی.
دمګړۍ په نړیوال بازار کې د تېلو بیې د ۹۴ ډالرو په شاوخوا کې نڅېږي. نړیوال پانګوال او سوداګر د ایران او امریکا راتلونکو خبرو اترو ته په تمه دي، ځکه هر ډول نوی بدلون کولی شي د تېلو بیې یو ځل بیا پورته یا ښکته کړي.
