په هرات کې د درملو تولید په وروستیو کلونو کې پراخ شوی او یوه درمل جوړونکې فابریکه وايي، د ۱۵۰ ډوله درملو د تولید وړتیا لري.
د دې فابریکې د معلوماتو له مخې، اوس مهال پکې د جامدو او مایع درملو بېلابېل ډولونه تولیدېږي.
د ۲۰ میلیونه ډالرو پانګونه شوې
د فابریکې مسؤولین وايي، په دغه شرکت کې شاوخوا ۲۰ میلیونه ډالره پانګونه شوې او نږدې دوه زره کسانو ته یې د کار زمینه برابره کړې ده.
د فابریکې تخنیکي مسؤول عارف شیرزاد وايي، هڅه کوي هغه درمل هم تولید کړي چې افغانستان یې اوس له بهرنیو هېوادونو واردوي.
د هغه په وینا، د تولیداتو د پراختیا ترڅنګ پلان لري چې په نږدې راتلونکي کې خپل درمل د اسیايي هېوادونو بازارونو ته هم صادر کړي.
هرات کې د درملو تولید د پراختیا په حال کې دی
په هرات کې د درملو تولید صنعت په وروستیو کلونو کې د پراختیا په حال کې دی.
د شته معلوماتو له مخې، په ۲۰۲۵ کال کې هم په دغه ولایت کې یوې بلې درمل جوړونکې فابریکې د ۱۳۰ ډوله درملو د تولید خبر ورکړی و.
د درملو د کورني تولید پراختیا کولی شي د وارداتي درملو د اړتیا په کمولو او د هېواد د درملو په بازار کې د کورنیو تولیداتو د ونډې په زیاتېدو کې رول ولري.
