د کابل او ممبي د نړیوالې سوداګرۍ مرکزونو تر منځ د چابهار بندر په اړه خبرې کړي دي
د افغانستان د سوداګرۍ نړیوال مرکز رییس وايي، چې که سوله ټینګه شي د افغانستان، هند او ایران ترمنځ سوداګري او پانګونه به څلور برابره شي او له همګټو هېوادونو سره به اقتصادي ادغام پیاوړی کړي.
ذبیح الله زیارمل د هند د ممبې نړیوال سوداګریز مرکز سره د تعامل پرمهال وویل چې « موږ باور لرو سوداګریزې اړیکې، پانګونه، ګرځندوی، فرهنګي او د زده کړو برخه کې اړیکې د اسیا د سویلي هېوادونو د سیاسي مسایلو د عادي کېدو لامل کېدای شي«.
د ټاپي پروژې چارې
هغه وايي چې کابل د سویلي اسیا او منځنۍ اسیا ترمنځ د اړیکو ښه والي ته ژمن دی.
د هند ددکن هیرالډ د رپوټ له مخې، نوموړي هیله ښودلې ده چې د ټاپي لس میلیارډ ډالري پروژې چارې زر روښانه شي.
د هند د ممبې نړیوالې سوداګرۍ مرکز رییس ډاکټر ویجې کالانتري ویلي چې افغانستان تر ۲۰۲۸ کال پورې د هند د پنځه تریلیون ډالري ناخالص داخلي تولید او تر ۲۰۴۰ کال پورې ددغه هېواد د ۴۰ تریلیون ډالري ناخالص کورني تولید د لید په برخه کې مهم رول لوبولی شي.
نور ولولئ: هند او ایران له چابهار بندره د ګټې اخیستو ۱۰کلن تړون لاسلیک کړ
نور ولولئ: تهران: طالبان سر له سبا له چابهار بندر کار اخیستلی شي
نور ولولئ: د هند له لوري افغانستان ته د چابهار بندر له لارې د ۲۰۰ ټنو درملو لېږد
هغه ویلي چې د افغانستان سوداګري ۹۹۷ میلیون ډالره ده، چې له ظرفیت ښکته ده، خو هند کولای شي د هوا او سمندر له لارې له افغانستان سره سوداګریزې اړیکې او پانګونه ډېره کړي.
چابهار بندر د هند او کابل نښلوونکی
هغه وايي چې چابهار بندر له افغانستان او د منځنۍ اسیا له هېوادونو سره په دې برخه کې د نوي ډیلي د نښلونې مهمه لاره ده.
هغه افغانستان، هند او ایران ته وړاندیز وکړ چې د چابهار بندر په سیمه کې پر لوژستیکي تاسیساتو، اورګاډي ځغللیکې او هوايي ټرنسپورټ پانګونه وکړي او دا لاره د منځنۍ اسیا او اروپا پر لور په یوې مهمې دروازې بدله کړي.
هغه وویل چې ددې چارې لپاره هندي صادروونکي بانکي اسانتیاوو، د بیړیو تمځایونو، ګودامونو، او ورته نورو اسانتیاوو ته اړتیا لري.
د یادونې وړ ده چې اسلام اباد تل د هند او افغانستان تر منځ د اړیکو د پراختیا او اقتصادي سیاست مخنیوی کړی او په دې برخه کې یې د پراکسي وار یا نیابتي ډلو کار اخیستی او په افغانستان کې یې تل تخریبي فعالیتونه ترسره کړي دي.
