اړوند خبر:
امریکايي پلاوي چې زلمی خلیلزاد هم په کې و، له امیرخان متقي سره لیدلي
د واشنګټن اګزیمینر خپرونې د امریکا د بهرنیو چارو وزارت او د ملي امنیت شورا ویاندانو له قوله راپور ورکړی چې امریکا « کابل کې د خپل سفارت د بیا پرانیستلو لپاره کومه برنامه نه لري.»
د دې راپور پر بنسټ، د امریکا د بهرنیو چارو وزارت ویاند، تیمي بروس، ویلي: «امریکا هېڅ اداره د افغانستان د حکومت په توګه نه پېژني، او له همدې امله د سفارت د بیا پرانیستلو لپاره کومه برنامه نه لري.»
له بلې خوا دا خپرونه وايي چې د امریکا د ملي امنیت شورا ویاند جیمز هویت ویلي: «موږ د واشنګټن کې د افغانستان سفارت په اړه هېڅ تعهد نه دی کړی او کابل کې د امریکا د سفارت د وضعیت په اړه هېڅ بحث روان نه دی.»
په ورته وخت کې واشنګټن اګزیمینر د افغانستان د داخلي سرچینو له قوله لیکلي چې طالبانو کابل ته د امریکایي پلاوي د سفر پر مهال، چې د «د طالبانو له زندان څخه د امریکایي وګړو د آزادۍ تضمین» هدف یې درلود، له دې پلاوي غوښتنه کړې چې دوی په اوږدمهاله توګه په رسمیت وپېژني.
دا خپرونه همدارنګه د سرچینو له قوله زیاتوي چې طالبانو په دې سفر کې له امریکایي پلاوي غوښتنه کړې چې په واشنګټن ډيسي کې د افغانستان سفارت دوی ته وسپاري او کابل کې د امریکا سفارت بیا پرانیستل شي.
واشنګټن اګزیمینر وايي چې د امریکایي پلاوي سفر کابل ته، چې په دې کې د افغانستان د سولې په چارو کې د امریکا پخوانی ځانګړی استازی زلمی خلیلزاد هم شامل و، بریالی و او امریکایي وګړي، جورج ګلزمن د مارچ په ۲۰مه او فی هال د همدې میاشتې په ۲۹مه، د طالبانو له زندان څخه آزاد شول.
