اړوند خبرونه:
طالبانو ته د ټرمپ ګواښ؛ په هره بیه د امریکا پاتې وسلې او وسایل درنه اخلم
راپورونه ښيي چې د پخواني افغان پوځ پورې اړونده لږ تر لږه اووه بلک هاوک هلیکوپټرې د امریکا متحده ایالاتو د دفاع وزارت له ازبکستان څخه واشنګټن ته لیږدولي دي.
ازبک رسنیو پرون (چهارشنبه، د فبروري ۷مه) راپور ورکړ چې د امریکا دفاع وزارت، د تخنیکي ارزونو وروسته، دا معلومه کړې چې چورلکې د کارونې لپاره مناسبې دي او متحده ایالاتو ته یې لیږدولي دي.
د ۲۰۲۱ کال په اګست کې د پخواني حکومت له نسکورېدو وروسته د پخواني افغان پوځ ټولټال ۴۶ پوځي الوتکې ازبکستان ته انتقال شوې. راپور ورکړل شوی چې د دغو پوځي الوتکو څخه ۲۲ او د هغوی څخه ۲۴ د بلیک هاک څو رول چورلکې دي، چې ۷ یې اوس متحده ایالاتو ته لیږدول شوي دي.
په همدې حال کې، د ازبکستان د وسلهوالو ځواکونو د جوړېدو د ۳۳مې کلیزې په مناسبت په واشنګټن کې د ازبکستان په سفارت کې د مراسمو په ترڅ کې، ازبک او امریکایي چارواکو د اړیکو په پیاوړتیا، په ځانګړې توګه د افغانستان او سیمهییز ثبات په اړه او د دفاع او امنیت په برخه کې د نږدې همکارۍ په ساتلو ټینګار وکړ.
دا په داسې حال کې ده چې د ا.ا د دفاع وزارت مخکې له ازبکستان څخه غوښتي وو چې دا پوځي الوتکې ا.ا ته وسپاري. د ۲۰۲۴ کال په اګست کې، وزارت د ازبکستان او متحده ایالاتو ترمنځ د افغان پوځ د پوځي الوتکو د برخلیک په اړه پر تړون نیوکه وکړه.
د ۲۰۲۴ کال په اګست کې، په تاشکند کې د امریکا سفیر، جوناتن هینیک، د افغانستان د پوځ د پخوانیو الوتکو د برخلیک په اړه له ازبکستان سره خپله موافقه اعلان کړه، او ویې ویل چې دا الوتکې د واشنګټن دي. د هغه په وینا، “دا الوتکې هیڅکله د افغانانو نه وې، بلکې د امریکا وې، او افغان پوځ یې کارولې، خو د دوی ملکیت تل له امریکا سره پاتې شو.”
د دې تړون په ځواب کې، د ا.ا د دفاع وزارت دا د منلو وړ نه وبلله او د ښه ګاونډیتوب له مخې یې له ازبکستان څخه وغوښتل چې “د افغانستان د هوايي ځواک د الوتکو په سپارلو کې ا.ا سره همکاري وکړي.”
د راپورونو له مخې، د پخواني افغان حکومت د هوايي ځواک پیلوټانو د ا.ا له خوا د هېواد د سقوط په لومړیو ورځو کې شاوخوا ۶۰ پوځي الوتکې او چورلکې ازبکستان او تاجکستان ته ولېږدولې.
