د وردګو ولایت چک ولسوالۍ په یوه لیرې پرته سیمه کې د ۱۵ لوبډلو ترمنځ د غیشویشتلو سیالۍ نن د «محمدیارخېل» لوبډلې په اتلولۍ پایته ورسېدې.
دا سیالۍ د کوچني اختر په دویمه ورځ د چک ولسوالۍ د «سېبکې درې» تر څېرمه پیل شوې وې او پایلوبه یې نن د کابلمېشت وردګ لوبډلې او محمدیارخېل لوبډلو ترمنځ وشوه.
په دغو سیالیو کې د «باباکلا، چک، دورانخېل، شبشخان» په ګډون د غیشلوبې ۱۵ لوبډلو برخه اخیستې وه او اتلولي د ۲۳ نمرو په توپیر «محمدیارخېل» لوبډلې ترلاسه کړه.
د وردګو ولایت د سپورټ امر، ذبیح الله وهاج غېشلوبه یوه تاریخي سیالي وبلله او په وینا یې چې دغو ژمنیو لوبو په وروستیو کلونو کې ډېره پراختیا موندلې ده.
وهاج افغانناو ته وویل: “هڅه کوو چې د غېشلوبې د پراختیا په موخه ورته تورنمنتونه جوړ کړو، تر څو د ځوانانو ترمنځ د امن او ورولۍ فضا رامنځته شي.”
په ورته وخت کې د یاد ولایت د چک ولسوالۍ د سپورټ کمېټې غړي، حسیب الله همدرد افغانناو ته ویلي چې غېشلوبې د دوی له پلرونو او نېکونو ورپاتې سیالۍ دي او دوی یې د پراخولو هڅې پیل کړې دي.
همداراز د دې تورنمنت یو بل لوبغاړي او د «کابل مېشت وردګ» ټیم غړي، لیکوال احسان الله باباوال له افغانناو په منننې یادې سیالۍ تاریخي وبللې او په وینا یې چې دا لوبې د خلکو ترمنځ یووالی رامنځته کوي.
د غشي ویشتو لوبه د ژمي په موسم کې د هېواد د سړو سیمو لوبه ده چې د دغو سیمو د اوسېدونکو د ساتېرۍ او یووالي په موخه ترسره کېږي.
