ولسمشر محمداشرف غني پرون ماسښین د مسلکي تعلیماتو او لوړو زدکړو اونۍ په لړ کې د لوړو زدکړو وزارت رهبري سره په ناسته کې د یاد وزارت د برنامو د تطبیق، فعالیتونو او لاسته راوړنو د څرنګوالي راپور واورېد.
په دغه ناسته کې چې په ارګ کې وشوه، د لوړو زدکړو وزیر او د یاد وزارت معین د محصلینو د خدماتو ریاست د ایجاد، د تحصیلي نصاب د بیا کتنې، د تقنیني اسنادو د تدوین، د ۱۴۰۰ کال د برنامو، پوهنتونونو لپاره د څېړنیزو پروژو د تخصیص، د پوهنتونونو د مالي خپلواکۍ طرحې او د یاد وزارت د پروژو د تطبیق په اړه چې په ښارجوړولو او ځمکو وزارت کې ځنډېدلي، خپل معلومات له جمهوررئیس سره شریک کړل.
ولسمشر غني د یاد راپور او معلوماتو له اورېدو وروسته په ټینګار وویل، مالیې وزارت باید د پوهنتونو مالي خپلواکۍ طرحې د پړاوونو بشپړولو په برخه کې جدي همکاري وکړي.همداراز جمهوررئیس د لوړو زدکړو وزارت د پروژو د بیا پیلېدو په اړه چې په ښارجوړولو او ځمکو وزارت کې ځنډېدلي لارښوونه وکړه،
نوموړي وویل یاد وزارتونه دې د ځنډېدلو پروژو د تطبیق په برخه کې ګډه جدي همکاري وکړي.د یادې کتنې په پای کې د هیواد جمهوررئیس د تحصیلي نصاب د کیفیت پر لوړولو ټینګار وکړ وې ویل، پوهنتونونه باید د هیواد د اړتیاو مطابق محصلین وروزي.
هغه زیاته کړه، په روان کال کې د حکومت تر ټولو ستر لومړیتوب دیجیټلي کېدل دي او د لوړو زدکړو وزارت رهبري څخه یې وغوښتل چې په دې برخه کې پر یوې طرحې کار وکړي.هغه وویل اوس وخت باید بې له ډیجیټل سازی یو اداره هم پاتې نشي
