اړوند خبر:
د تورخم دروازې د پرانیستې په تړاو د طالبانو او پاکستان ناسته بې پایلې وه
نن څلورمه ورځ ده چې پاکستان د تورخم دروازه د هر ډول تګ راتګ لپاره تړلې ده.
تورخم کې د طالبانو کمیسار، عبدالجبار حکمت وایي، دا دروازه د څلورو شپو په تېرېدو لا هم پاکستاني لوري د هر ډول تګ – راتګ پر وړاندې تړلې ده.
حکمت زیاتوي، تېره ورځ یې د ننګرهار د مرستیال والي په مشرۍ له پاکستاني مسوولینو سره غونډه کړې وه خو بې پایلې پایته ورسېده.
هغه وایي چې پاکستاني لوري ترې غوښتنه کړې چې د ډېورنډ فرضي کرښې ته څېرمه دې تاسیسات نه جوړوي او هممهاله دې د پاکستان له لوري د تاسیساتو د جوړولو مخه هم نه نیسي.
د حکمت په خبره؛ د پاکستاني مسوولینو دا غوښتنه یې رد کړې چې په غبرګون کې هغوی د دروازې له پرانیستلو ډډه کړې ده.
تورخم دروازه څلور شپې وړاندې د پاکستان له لوري هغه مهال وتړل شوه چې، دې غاړې ته طالبان د تاسیساتو پر جوړولو بوخت وو.
د دروازې دواړه غاړې ته په سلګونه کسان او بار وړونکي موټر د تګ انتظار کوي.
