د پاکستان پوځ د اعلان شوو عزم استحکام په نامه د عملياتو او د تحريک انصاف ګوند پر ضد کړنو دفاع کړې ده

د پوځ د عامه اړيکو ادارې (ای اېس پي ار) ویاند ډګر جنرل احمد شريف د جولای پر ۲۲مه په راولپينډۍ کې په يوه خبري غونډه کې وويل چې “عزم استحکام عمليات” ډير زیات ضروري دي خو دا به يوازې پوځي کاروايي نه وي بلکې ګڼ اړخونه لري”.

نوموړي زیاته کړه چې په روان ۲۰۲۴ز کال کې پوځ هره ورځ ۱۱۲ ځلې چاپې او کامینونه اجرا کړې چې پکې د ده په خبره، ۱۳۷ پوځيان او ۳۹۸ وسله وال وژل شوي دي.

شريف زیاته کړه چې پخوا به سيمې له وسله والو څخه پاکې کړل شوې خو پوځ به هلته نه پاتې کېده، د ده په وینا، دا سم کار نه وو او پکار ده چې پوځ په هغو سیمو کې پاتې شي تر څو سيمې بېرته د وسله والو لاس ته ورنه شي.

د عزم استحکام عملیات

د جون پر ۲۲مه د پاکستان وزیراعظم شهباز شريف په مشرۍ د لوړپوړې کمېټۍ په غونډه کې پرېکړه شوې وه چې د “ترهګرۍ او سختدريځۍ” پرضد به د “عزم استحکام” په نوم عملیات کوي.

نور ولولئ: پاکستان کې ناامني؛ ډیره اسماعیل خان کې چاودنې ۲۷ کسانو ته مرګ ژوبله اوړلې

نور ولولئ: پاکستان کې د ناامنۍ اوج؛ باجوړ کې بمي چاودنې ۲۶ پولیسو ته مرګ ژوبله اړولي

نور ولولئ: تحریک طالبان پاکستان په فبرورۍ کې ۱۷۲ پاکستاني پوځیان او پولیس وژلي

تر هغې وروسته اکثرو حکومت مخالفه ګوندونو او قبايلي مشرانو د عملیاتو مخالفت وکړ او دا يې د ولس په زيان وبلل. د عملیاتو د اعلان پر ضد په پېښور، سوات، خیبر، اورکزیو، وزیرستانونو او د خیبر پښتونخوا په نورو سیمو کې احتجاجونه شوي دي.

د جون پر ۲۴مه د وزيراعظم دفتر په یو بیان کې وويل، نوي عمليات د پخوانيو په څېر نه دي او دا ځل به پر دومره پراخ کچه جنګ نه کېږي چې خلک بې کوره شي.

جنرل احمد شريف دا هم وويل، په پاکستان کې بايد ټولې مدرسې ثبت شي. د هغه په وينا د ۵۰ فيصده مدرسو په اړه ډېر معلومات نه شته چې په مالي ډول څنګه چلول کېږي.

د تحریک انصاف ګوند ته د پوځ نیت

جنرل احمد شريف د خبري غونډې پر وخت پر تحريک انصاف سختې نیوکې وکړې. هغه دعوه وکړه چې دغه ګوند د “ریاستي ادارو پر ضد خپل تبلیغات” جاري ساتلي دي.

پي ټي ای د پوځ د ویاند تازه څرګندونو ته څه غبرګون نه دی ښوولی خو په تېر وخت کې یې مشرانو ويلي ول چې پوځ باید په سياست کې مداخله ونه کړي او د امنيت ساتلو دندې ته پام وکړي.

خو شريف وويل چې که د دې ګوند مشرانو ته د مې نهمې د خونړیو مظاهرو په تور پوره سزا ورکړل شوې وایه نو د ده په خبره، د نورو لپاره به یو درس وو.