پاکستان او ترکمنستان د افغانستان له لارې د ټاپي پروژې د چارو پر چټکولو خبرې کړي دي
طالبانو هم بار، بار ټینګار کړی چې د ټاپي پروژې کارونه باید پیل او چټک شي، خو تازه د پاکستان د پترولو وزیر وايي، له ترکمنستان سره د ټاپي پروژې په برخه کې د ګډې همکارۍ لپاره پرمختګ شوی او له مخې به یې د دې پروژې د پلي کولو چارې چټکې شي.
مصدق ملک وايي، دا پرېکړه پلازمېنې اسلام اباد ته د ترکمنستان د بهرنیو چارو وزیر رشید مرادوف په دوه ورځنۍ لیدنه کې شوې ده.
ټاپي پروژه او اقتصادي وصلتوب
د پاکستان راډیو نن په یوه خبر کې د نوموړي له قوله ویلي، چې په دغو خبرو کې د اقتصادي وصلتوب او د انرژۍ اړتیا د خوندیتوب لپاره ټاپي پروژه کې د ګډې همکارۍ لپاره ځانګړی پرمختګ شوی دی او دې سره به د دې پروژې د پلي کول چارې چټکې شي.
د ترکمنستان د بهرنیوچارو وزیر تېره اونۍ پاکستان ته د یوه پلاوي په مشرۍ تللی و.
نور ولولئ: د ټاپي پروژې پرمختګ
نور ولولئ: د ټاپي پروژې تطبیق لپاره تخنیکي چمتووالی نیولی
ټاپي پروژه د ترکمسنتان لوېدیځ کې له ګلکینش پیلېږي، د افغانستان له هرات او کندهار په تېرېدو سره د پاکستان کوټې او ملتان ته رسېږي او بیا د هند لوېدیځ کې فزیلکا ته رسېږي.
د دې پروژې د پلي کولو خبرې د طالبانو لومړنۍ واکمنۍ کې په ۱۹۹۰ کلونو کې پیل شوې.
په افغانستان کې د ناامنۍ له امله د ټاپي پروژې ځنډ
د دې پروژې د رسمي کار پیل د ۲۰۱۵ کال په ډیسمبر کې د ترکمنستان پلازمېنه عشق اباد کې د افغان ولسمشر اشرف غني، د پاکستان د هغه وخت لومړي وزیر نواز شریف او هندي او ترکمن مشرانو له خوا پرانیستل شو.
تمه وه چې د لس میلیارد ډالرو په ارزښت دا اتلس سوه کیلومتره اوږده پروژه په ۲۰۱۹ کال کې پلې شي، خو په افغانستان کې د ناامنۍ له امله تر اوسه د کاغذ پرمخ پاتې ده.
خو اوس طالبان ادعا کوي چې د افغانستان په هره ګوښه واکمن دي او په ټول افغانستان کې امن دی، چې د ټاپي په څېر هر ډول پروژې په کې پلي کېدلی شي.
ددې پروژې شریک هېوادونه هم غواړي چې هر څومره ژر کېدای شي، باید د یادې پروژې چارې پیل شي.
طالبانو هم بار، بار ټینګار کړی چې د ټاپي او کاسه۱۰۰۰ پروژې کارونه دې پیل شي.
