پر موټر د نجونو وهل؛ د کابل د پولیسو ویاند خالد ځدراڼ ویلي، هغه کس چې د کابل ښار په شپږمه امنیتي حوزه کې یې خپل موټر د نجونو او ښځو پر یوې ډلې ورروان کړی و، پېژندل شوی او د نیولو هڅې یې روانې دي.
د چارواکو په وینا، په دې پېښه کې درې ښځې ټپیانې شوې دي چې روغتون ته لېږدول شوې او روغتیايي وضعیت یې د ډاډ وړ بلل شوی دی. پولیسو تر اوسه د مشکوک کس هویت او د پېښې انګېزه نه ده څرګنده کړې.
پر موټر د نجونو وهل؛ پېښه څنګه رامنځته شوه؟
د راپورونو له مخې، دا پېښه د جوزا په ۱۷مه د کابل ښار په یوه بوخته سیمه کې شوې ده. شاهدان وایي، یو سپین رنګ لېنډکروزر موټر چې نمبرپلېټ یې نه درلود او ښیښې یې تورې وې، د سړک پر غاړه پر روانو نجونو او ښځو ورختلی او هغوی یې ټپیانې کړې دي.
د پېښې له رامنځته کېدو وروسته د سیمې اوسېدونکو او لارویانو ټپیانې روغتیايي مرکزونو ته رسولي دي.
د پېښې ویډیو په ټولنیزو رسنیو کې خپره شوې
پر موټر د نجونو وهل پېښې ویډیو په ټولنیزو رسنیو کې په پراخه کچه خپره شوې او د خلکو ګڼ غبرګونونه یې راپارولي دي. په ویډیو کې ښکاري چې موټر په چټکۍ سره د سړک پر غاړه د روانو کسانو پر لور ځي.
پولیسو ویلي چې د پېښې د عامل د نیولو او د موضوع د بشپړې څېړنې لپاره اقدامات روان دي، خو تر اوسه یې د نیولو خبر نه دی ورکړی.
