خیبر کې د مارټر ګولو برید کې د ماشومانو په ګډون يوشمېر کسان ژوبل شوي
د خيبر په تيرا کې د مارټر ګولو بريد په نتيجه کې د ماشومانو په ګډون يوشمېر ځايي کسان ژوبل شوي دي.
د پېښور په حیات اباد مېډيکل کمپلېکس کې له ژوبلو ماشومانو سره مل کسانو رسنیو ته ويلي چې د اکتوبر پر ۲۱مه په پير مېله سيمه کې لومړی د پاکستان پوځ د لویو ډرون کېمرو پروازونه وکړل او بیا یې مارټر ګولې يا د هاوان مرمۍ وتوغولې چې په نتيجه کې يې د ولسي خلکو کورونه په نخښه شول او يو شمېر ماشومان او لويان پکې ژوبل شول.
روغتونونو د وړل شوو ټپیانو شمېر
د حیات اباد مېډيکل کمپلېکس ډاکټرانو او هلته موجود په خيبر پښتونخوا اسمبلۍ کې د خيبر منتخب استازي سهیل اپرېدي رسنیو ته وويل چې خواوشا ۱۱ ژوبل ماشومان روغتون ته وروړل شوي دي.
سهېل اپرېدي زياته کړه چې په دې پیښه کې ځينې نور ځایي وګړي هم ژوبل شوي چې په تيرا کې طبي مرستې ورکړل شوې دي.
اپریدي په خپله اېکسپاڼه لیکلي دي چې عیني ګواهانو ورته ویلي دي چې هغه برید د ډرون الوتکې کړی دی.
نور ولولئ: پاکستان کې د ‘پي ټي ایم’ لسګونو غړو نیونې غبرګونونه راپارولي
نور ولولئ: د پي ټي اېم مشر: راتلونکې اوونۍ کې د ډالري جنګونو د ختمولو لپاره د امن پاڅون کوو
بلخوا په خیبر کې مېشت د امنیتي ځواکونو یوه چارواکي د خپل نوم نه خپرولو په شرط رسنیو ته ويلي چې د اکتوبر پر ۲۱ يې د تیرا په پیر مېله سيمه کې د عملياتو پر مهال د تحريک طالبان پاکستان وسلوالې ډلې اووه غړي ژوبل کړي دي.
خو ازادو سرچينو د امنیتي ځواکونو له خوا وسلوالو ته د ځاني زیان اړولو د ادعاوو تصديق نه دی کړی او نه هم تر اوسه وسلوالو په دې اړه غبرګون ښوولی دی.
یادې پېښې ته د منظور پشتین غبرګون
پښتون ژغورنې غورځنګ (پي ټي اېم) او د خیبر سیاسي اتحاد مشرانو د دې پېښې غندنه کړې او پر امنيتي ځواکونو يې غږ کړی دی چې د عملیاتو پر مهال دې د ولسي وګړو په نخښه کولو څخه ډډه وکړي.
د غورځنګ مشر منظور پشتین پر اېکس د ځینو ژوبل ماشومانو د انځورونو خپرولو ترڅنګ تور لګولی دی چې ریاست د پښتنو په سیمه کې د جنګي تګلارې تر ناکامېدو وروسته په عامو خلکو بریدونه پيل کړي دي.
د خیبر پښتونخوا په قبایلي ضلعو کې ځای خلک وخت په وخت په ولسي ځایونو د مارټر ګولیو د لګېدو شکایتونه کوي. په وزیرستانونو او کورمه کې مارټر ګولۍ لګېدو په بېلا بېلو وختونو کې مرګژوبله اړولې ده چې پر ضد یې ځای خلکو احتجاجونه هم کړي دي.
