په افغانستان کې يوټيوب چينلون بېلابېلو ویډیويي پروګرامونو په لرلو سره پر کور دننه او بهر ګڼ مینهوال موندلي
«سن رایز افغانستان» يو یوټیوب چینل دی چې د سباوون مومند له خوا جوړ شوی او د دې شبکې له لارې د افغانستان د کمو لیدل شویو سیمو ویډیوګانې خپلو لیدونکو ته وړاندې کوي.
په دې اړه د نوموړي چينل جوړونکی وايي د افغانستان بېلابېل ځايونه په ويډيويي بڼه او خپلو مينوالو ته وړاندې کوي
مومند وايي، د افغانستان ۲۲ ولایتونو ته یې سفرونه کړي او د دغو ولایتونو ویډیويي راپورونه یې جوړ کړي دي.
نوموړی وايي:” موږ هڅه کوو چې هغه سیمو ته ورشو چې پخوا هلته تګ سخت و. په دې څوک نه پوهېدل چې په هلمند کې د اسیا په سطحه ډېر ښه مالوچ کېږي. د بېلګې په توګه د خوست، پکتیا، نورستان او پکتیکا تورې جلغوزې ډېرې ښې دي. ۲۲ ولایتونو ته لاړو، داسې سیمې مو د کامرې ښکار کړې چې بیخي چا تصور نهکاوه چې دا به افغانستان وي. ان د سیمې خلک نه پوهېدل چې د افغانستان کوم نظام دی. تېر کال د کونړ یوې سیمې ته تللی وم، راته یوه سپین ږیري وویل چې اوس به هم زموږ پادشاه ظاهر شاه وي.
نور لولئ: غوره افغان یوټیوبران
«کابل» د یوټیوب یوه بله شبکه ده چې په یوه کال کې یې د تفریحي، سېلاني او اړمنو کسانو ته د مرستې پروګرامونو په خپرولو سره تر ۵۰ زره زیات سبسکرایبران موندلي دي.
د یوټیوب شبکو لیدونکي په ځانګړې توګه له افغانستانه بهر د افغان یوټیوبرانو له کورني پروګرامونو سره ډېره مینه لري.
رایحه مسعودي چې په جرمني کې اوسېږي ازادي راډیو ته یې وویل، د افغان یوټیوبرانو د خپرونو په کتلو سره د وطن لریتوب کم احساسوي.
په افغانستان کې له سیاسي بحرانونو وروسته، د هغو رسنيو فعالیتونه چې ټولنیز او تفریحي خپرونې یې درلودې محدود او یا هم په بشپړه توګه ودرول شوې
د دغه محدوديتونو په نتيجه کې یوټیوب شبکې او د افغان یوټیوبرانو بازار تود شو او ظاهرا د هغوی خپرونې، په افغانستان او بهر کې د خلکو په منځ کې خپل ځانګړی ځای موندلی.
نور ولولئ: په 2023 کې د یوټیوب چینل پیل کولو لپاره غوره نظر
افغان یوټیوبران وایي، د خپرونو په جوړېدو په دې توانېدلي چې له دې لارې پیسې وګټي او تر څنګ یې په افغانستان او بهر ملکونو کې د خپلو مینهوالو لپاره سرګرمي جوړه کړي.
