د طالبانو د امیر ملا هیبت الله اخوند په امر ۸ دولتي ارګانونه وزارتونو کې مدغم شوي دي

کارپوهان وايي چې هېواد کې د بې کارۍ کچه لوړه ده، خو ددې ارګانونو په مدغم کېدو سره به دغه کچه نوره هم لوړه شي.

د ځینو راپورونو پر بنسټ، د بېلابېلو ادارو اړوند ۳۵ زره مامورین بې کاره شوي دي.

تازه د طالبانو د رژیم ویاند ذبیح الله مجاهد ویلي، چې د دوی عمومي مشر ملا هبت الله ۸ دولتي ارګانونه په یو شمېر وزارتونو کې مدغم کړي.

هغه په دې اړه لیکلي:

۱- د تفتیش عالي اداره د معاونیت بست د احکامو او فرمانونو د څارنې او تعقیب له ریاست سره مدغم شوې.

۲- د افغانستان طبي عالي شورا د عمومي ریاست په بست کې د عامې روغتیا له وزارت سره مدغم شوې.

۳- د خوړو او درملو ملي اداره د معینیت په بست کې د عامې روغتیا له وزارت سره مدغم شوې.

۴- د وسپنې پټلۍ اداره د معینیت په بست کې د ټولګټو له وزارت سره مدغم شوې.

نور ولولئ: د نړیوال بانک په مرسته راتلونکې میاشت د کاسا۱۰۰۰ پروژې کار پیلېږي

نور ولولئ: نړیوال بانک په افغانستان کې د کاسا-۱۰۰۰ پروژې د بیا پیل لپاره ۳۰۰ میلیون ډالر ځانګړي کوي

۵- د تېلو او ګازو مرکزي او ولایتي ازماېښتونونه او تشکیلات یې د سټنډرډ او نورم له ملي ادارې څخه د مالیې وزارت د عوایدو او ګمرکاتو له معنیت سره مدغم شوي.

۶- د خوراکي توکو مرکزي او ولایتي ازماېښتونونه او تشکیلات یې د سټنډرډ او نور له ملي ادارې څخه د عامې روغتیا وزارت د خوړو او درملو له معینیت سره مدغم شوي.

۷- د حرفه يي زده‌کړو ادارې د کار او ټولنیزو چارو له وزارت سره مدغم شوي.

۸- د اولمپیک ملي کمېټه د بدني روزنې او ورزش له عمومي ریاست سره مدغم شوې او د اولمپیک، بدني روزنې او ورزش د عمومي ریاست په نوم نومول شوې ده.

تشکیلاتي پړسوب

مجاهد زیاتوي، چې دغه کار د تشکیلاتي پړسوب، د زیاتو لګښتونو د مخنیوي او تر یوه صلاحیت لاندې ادارو په کارونو کې د لا ډېرې اغېزمنتیا لپاره شوی دی.

د طالبانو ویاند ویلي، چې د دوی د مشر د فرمان له مخې، په وزارتونو کې د مدغم شویو ادارو کارکوونکي دې د اړتیا له مخې په هماغو بستونو کې وګومارل شي.

دا پرېکړه ځینو څارونکو ستایلې، خو ځینې نور باور لري چې د افغانستان دولتي جوړښتونه ستونزې لري، خو طالبان د دې ستونزو په اصلاح نه پوهیږي او هڅه کوي چې دولتي تشکیلات د خپلو پلویانو د ګومارلو لپاره ترسره کړي.