طالبان وايي، د روغتیا وزارت یې په یوولسو ولایتونو کې د پولیو ضد واکسین کمپاین پیل کړی دی
دا کمپاین په داسې حال کې پیلېږي چې لا هم په افغانستان او پاکستان کې د پولیو پېښې ثبتېږي او دا پېښې د صفر تر کچې ټېټې شوي نه دي.
د دغه وزارت ویاند شرافت زمان په وینا په کونړ، ننګرهار او لغمان کې دوه ورځې وړاندې یعنې د اکتوبر له ۲۱مې پیل شوی دی. په دغو ولایتونو کې د ګوزڼ د خپرېدو وېره پرتله ییز ډول ډېره ده، ځکه واکسینونه هم د نورو ولایتونو پرتله ډېر په کې کېږي. دا وروستیو کې د پولیو پېښې هم دغو ولایتونو کې ډېرې وې.
دا وکسین څومره ماشومانو ته تطبیق کېږي؟
د ښاغلي شرافت په وینا په دغه کمپاین کې به شپږ اعشاریه پنځه دېرش میلیونه ماشومان واکسین کړای شي.
په روان لمریز کال کې په افغانستان کې د پولیو شپږ مثبتې پېښې ثبت شوي، خو تېر کال دا شمېر دوه پېښې و.
د طالبانو حکومت د روغتیا وزارت وايي دا کمپاین به د اکتوبر میاشتې تر شپږویشتمې نېټې په بغلان، غزني، کابل، کاپیسا، خوست، کونړ، کندز، لغمان، نورستان، پکتیا، پکتیکا، پروان او تخار ولایتونو کې روان وي.
نور ولولئ: د طالبانو حکومت روغتیایي مسوولین وايي د پولیو ناروغۍ په مخنیوي کې د خلکو ملاتړ اړین دی
افغانستان کې اوس هم ځینې کورنۍ خپل ماشومان د بېلابېلو لاملونو له کبله نه واکسینوي، چې دا د ماشوم د بدن دفاعي وړتیا کموي او په دې توګه په اسانۍ په پولیو یا ګوزڼ ناروغۍ اخته کېدای شي.
پولیو یوه خطرناکه ناروغي ده
ګوزڼ عموما تر پنځو کلو کم عمره ماشومان اغېزمنوي او درملنه یې ناشونې ده.
د ماشومانو لپاره د ملګرو ملتونو وجهي صندوق (یونیسف) د معلوماتو له مخې په تېرو څو میاشتو کې د ډیورنډ کرښې بلې غاړې ته هم د ماشومانو د ګوزڼ ځينې پېښې ثبت شوې دي.
د طالبانو د روغتیا وزارت د ګوزڼ وېروس د مخنیوي لپاره د ټولنې له مشرانو او په ځانګړي ډول له میندو او پلرونو غواړي چې خپل ماشومان واکسین کړي.
نور ولولئ: افغانستان ولې د پولیو واکسین ته اړتیا لري؟
ډاکټران وايي، په افغانستان کې د پولیو په اړه عامه پوهاوي ډېر اړین دی او د کافي پوهاوي د نشتوالي له امله په ځینو سیمو کې خلک خپل ماشومان د پولیو پرضد نه واکسینوي.
د یادونې ده چې افغانستان او پاکستان نړۍ کې هغه دوه هېوادونه دي چې لا هم د ماشومانو د ګوزڼ پېښې په کې رامنځته کېږي.
پر دې سربېره د طالبانو په تېر شکلن جنګ کې په هغو سیمو کې د واکسین تطبیق ته اجازه نه ورکول کېده، چې د دوی تر نفوذ لاندې وې.
