اړوند مطالب:
کوم خواړه نارينه جنسي قوت زياتوي؟
جنسي اړیکو ته د کمې لېوالتیا لاملونه
د مغزي سکتې په مخنیوي کې مرسته کوونکي خواړه
د روغتیا نړیوالې سازمان (WHO) په یوه نوې لارښوونه کې د سوډیم د مصرف د کمولو پر اړتیا ټینګار کړی او د زیاتې مالګې د زیانونو په اړه یې خبرداری ورکړی دی. خو کوم خوراکي مواد کولای شي د مالګې ځای ونیسي؟
د زیاتې مالګې د استعمال زیانونه
د مالګې ډېر خوړل د روغتیا لپاره جدي پایلې لرلی شي. د لوړې اندازې سوډیم د وینې فشار، د زړه ناروغۍ، مغزي سکتې او د پښتورګو ستونزې ډېروي. همدارنګه، د مالګې زیات استعمال د بدن کلسیم کموي، چې دا د هډوکو روغتیا ته زیان رسوي.
د روغتیا نړیوال سازمان سپارښتنه کوي چې د سوډیم ورځنی مصرف باید له ۲ ګرامه زیات نه شي. د دې مادې زیات استعمال د زړه ناروغۍ، لوړ فشار، مغزي سکتې، د سترګو د نظر کمزورتیا او د هډوکو د کمزورتیا خطر زیاتوي.
د سوډیم د مصرف کمولو اړتیا
دې سازمان په دې وروستیو کې د ټیټ سوډیم لرونکو بدیلو موادو په اړه لارښوونې خپرې کړي او ټینګار یې کړی چې په ټوله نړۍ کې باید د سوډیم مصرف کم شي.
په دې راپور کې راغلي چې هر کال ۱.۹ میلیون کسان د زیات سوډیم د مصرف له امله د زړه د حملې یا مغزي سکتې له کبله ژوند له لاسه ورکوي. نوې څېړنې ښيي چې د مالګې بدیلونه د مغزي سکتې خطر ۱۴ سلنه او د مړینې خطر ۱۲ سلنه کموي.
د سوډیم د کمولو ګټې
د سوډیم کم استعمال په اوږدمهال کې د هډوکو روغتیا ته هم ګټه رسوي.
د مالګې ۸ بدیلونه
د سوډیم د کمولو لپاره ۸ داسې بدیلونه شته چې د خوراک خوند ته زیان نه رسوي، خو روغتیا ته ګټه لري.
۱. دودیز بدیلونه
د سوډیم پر ځای د مالګې ځینې بدیلونه پوټاشیم لري، چې عامې مالګې ته ورته خوند لري. پوټاشیم د وینې فشار کموي، خو هغه کسان چې د پښتورګو مزمنې ناروغۍ لري، باید دا ډول بدیلونه ونه کاروي، ځکه اضافي پوټاشیم یې بدن نه شي دفع کولی.
۲. لیمو او نور تروشې مېوې
په خوړو کې د لیمو او د لیمو پوستکي اچول د مالګې بدیل کېدای شي. دا مواد د کب په غوښه، پخېدونکو سبزیجاتو لکه پالکو، سالاتې، سوپ، ساس او حتی ډسرونو کې د مالګې په ځای کارولی شو. که تازه لیمو نه وي، د لیمو له پوډرو هم کار اخیستلی شو.
۳. سرکه
لږ سرکه د مالګې په څېر په خوړو کې خوند زیاتوي او د مالګې په شان د خوراک تريخوالی کموي.
۴. پیاز
پیاز خوړو ته طبیعي خوږوالی او پیاوړی خوند ورکوي. که تازه پیاز نه وي، د پیاز پوډر یا وچ پیاز هم کارېدلی شي.
۵. د سموک پاپریکا پوډر
دا مساله خوراک ته د مالګې پر ځای یو ځانګړی خوند ورکوي.
۶. د خوړلو خمیره
دا خمیره د پنیر په څېر خوند لري، خو سوډیم او غوړ یې ډېر کم دي.
۷. د هوږې پوډر
د مالګې پر ځای د خوږ او توند خوند لپاره د هوږې پوډر غوره انتخاب دی.
۸. امسالې او خوشبویي لرونکي بوټي
مسالې لکه د هوږې پوډر، د پیاز پوډر، ریحان، ویلنی، پودینه او روزماري خوراک ته بېساری خوند ورکوي. همدارنګه، تازه سبزیجات لکه دڼیا او تراتیزک د بدن لپاره ګټور دي.
د مالګې د کمولو لپاره صبر وکړئ
د تغذیې متخصصان وايي چې بدن د ۲ او ۳ میاشتو ترمنځ د کمې مالګې په خوند عادتېږي. د بېلابېلو مسالو او طبیعي خوندونو کارول کولی شي چې د مالګې کمښت جبران کړي او خوراک همداسې خوندور وساتي.
