هند ویلي دي چې په تبت کې د اوبو بند په اړه یې چین ته خپلې اندېښنې ور رسولي دي
د هند د بهرنیو چارو وزارت وايي نوي ډیلي بیجینګ ته د چین د هغه پلان په اړه خپلې اندیښنې رسولې، چې غواړي په تبت کې د یارلونګ زنګبو سیند باندې، بریښنا بند جوړ کړي. چین وايي، دا پروژه به په چاپیریال یا د اوبو رسولو برخه کې لوی اغیز ونه لري خو هند او بنګله دیش یې په اړه اندیښنې لري.
د رویټرز د رپوټ له مخې، یارلونګ زنګبو له تبت تر وتلو او د هند د اروناچل پردیش او اسام ایالتونو ته تر رسېدو وروسته د جنوب په لور بهیېږي د برهماپترا سیند ور څخه جوړیږي، چې په پای کې بنګله دیش ته رسیږي.
له چین د ډاډ تر لاسه کولو غوښتنه
د هند د بهرنیو چارو وزارت ویاند رندهیر جیسوال په اونیزه خبري ناسته کې نن د دغې پروژې په اړه وویل:« له چین غوښتنه شوي ده، چې باید ډاډ ترلاسه کړو، چې د برهماپترا سیند لاندې سیمې باید د لوړو سیمو د ګټو له امله زیانمنې نه شي.»
نوموړي وویل:«موږ به د خپلوګټو د ساتنې لپاره څارنې ته دوام ورکړو»
د راپورونو له مخې، د دې بند جوړول چې تېره میاشت تصویب شوي، په نړۍ کې به د خپل ډول ترټولو لوی بند وي او په کال کې به د ۳۰۰ ملیارد کیلو واټ بریښنا ظرفیت ولري.
نور ولولئ: هند او ایران له چابهار بندره د ګټې اخیستو ۱۰کلن تړون لاسلیک کړ
نور ولولئ: تهران: طالبان سر له سبا له چابهار بندر کار اخیستلی شي
نور ولولئ: د هند له لوري افغانستان ته د چابهار بندر له لارې د ۲۰۰ ټنو درملو لېږد
همدارنګه د هند د بهرنیو چارو وزارت ویاند وویل، چې نوي ډیلي د بیجینګ سره د دوو نویو ښارونو د جوړولو په اړه هم خپل “جدي اعتراض” ثبت کړی دی.
جیسوال وویل:«په دغه سیمه باندې د نویو ښارونو جوړول په سیمه کې هیڅ داسې اثر ونه ولري، چې دا سیمه زموږ تر حاکمیت لاندې ونه ګڼل شي او نه د چین غیرقانوني او جبري اشغال ته مشروعیت ورکړي.»
د دواړو هېوادونو تر منځ اړیکې
د اسیا د لویو هېوادونو هند او چین ترمنځ اړیکې، چې په ۲۰۲۰ کال کې د دوی په جنجالي پوله کې د یوې مرګونې پوځي نښتې وروسته ترینګلې شوې وې، د اکتوبر په میاشت کې د لویدیځ همالیا په غرونو کې له دوو د سرتیرو د ایستلو یوې موافقې ته تر رسیدو وروسته د ښه کیدو په حال کې دي.
د دواړو هېوادونو د پوځونو ترمنځ تر هوکړې وروسته، دواړه خواوې په پوله کې له جنجالې سیمې پر شا شول او په تېرو پنځو کلونو کې د دواړو هېوادونو لوړ پوړو چارواکو تېره میاشت د لومړي ځل لپاره رسمي خبرې وکړې او دوی هوکړه وکړه،چې د اړیکو ښه کولو لپاره به ځینې ګامونه هم پورته کړي.
