له افغانستان د ایستلو په بهیر کې کاناډا نور افغانان هم انتقال کړي دي
کاناډايي چارواکي وايي، چې تازه یې تیره ورځ ۳۰۹ نور افغان کډوال انتقال کړي، چې ورسره د هغو افغانانو شمیر، چې د ۲۰۲۱ د اګسټ د میاشتې وروسته دغه هیواد ته رسیدلي نږدې ۳۵ زرو تنو ته رسیدلی دی.
د کاناډا د مهاجرت، پناه ورکوونې او اوسیدنې د چارو وزیر شان فریزرد چهارشنبې په ورځ جولای۱۲(چنګاښ ۲۱) د خپل ټویټر په پاڼه دغه هیواد ته د ۳۰۹ نوو افغان کډوالو د رسیدلو خبر ورکړی دي.
دا هغه کسان کې چې هېواد کې یې له کاناډایانو سره کار کړی
شان فریزر ویلي، چې کاناډا ته په تازه رسیدلو افغانانو کې هغه کسان، چې په افغانستان کې یې د کاناډايي ځواکونو سره کار کړی و او هم د بشري حقونو فعالان او د هغوی د کورنیو غړي شامل دي.
ښاغلي فریزر لیکلي:” د روان کال ترپایه لږ ترلږه د ۴۰ زره افغانانو د بیا میشت کیدو په اړه زمونږ د ژمنې په لړ کې تراوسه نږدې ۳۵ زره افغان کډوال کاناډا راغلي دي”.
دوی په ځانګړو کرایه شوو الوتکو کې انتقال شوي
د کاناډا د مهاجرت، پناه ورکوونې او اوسیدنې د چارو وزیر دا نه دي ویلي، چې ۳۰۹ افغان کډوال یې له کوم هیواد څخه تخلیه کړي دي. هغه ویلي، چې دا شمیر افغان کډوال په يو ځانګړې کرایه شوې الوتکه کې د کالګري هوايي ډګر ته رسول شوي دي. اوس مهال کاناډا په منظم ډول د ځانګړو کرایه شوو الوتکو په واسطه د پاکستان، تاجیکستان او متحده عربي اماراتو څخه افغان کډوال دغه هیواد ته انتقالوي.
کاناډايي چارواکو د مۍ ۲۷ (جوزا شپږم) ویلي و، چې له متحده عربي اماراتو څخه دغه هیواد ته به ۱۰۰۰ افغان کډوال انتقال شي.
نور ولولئ: له افغانستان نه د وګړو ایستلو کې د بریتانیا پر خارجه وزارت د بې پروګرامۍ او ګډوډۍ تورونه لګیدلی
دمخه شان فریزر ویلي و، چې د کاناډا د بشردوستانه بیا میشت کیدو پروګرام کې زیاته پاملرنه ښځینه رهبرانو، بشري حقونو ملاتړو، مذهبي اقلیتونو، خبریالانو او نورو هغو افغانانو ته، چې د ګواښونو سره مخ دي کیږي.
ددغه کاناډايي چارواکي د وینا له مخې کاناډا د روان ۲۰۲۳ کال تر پایه شاوخوا ۴۰ زره افغان کډوالو ته د پناه ورکولو او په دغه هیواد کې د ځای پرځای کولو باندې کار کوي.
د ۲۰۲۱ کال د اګست په میاشتې کې د افغانستان د پخواني حکومت تر سقوط وروسته، کاناډا ژمنه وکړه، چې ۴۰ زره هغه افغان پناه غوښتونکې چې د طالبانو په رژیم کې یې ژوند په خطر کې وي، کاناډا ته انتقال کړي.
