اړوند خبرونه:
داسې مخلوقات او تمدونونه شته چې کېدای شي انسانان ورسره اړیکه ونیولی شي
په زړه پورې کاینات؛ جیمز ویب د یوه لرې ستوري ښکلا ښيي
د فوټبال نامتو ستوري، کرېسټیانو رونالډو، له خپلې اوږد مهاله ملګرې، جورجینا روډریګز، سره تر اتو کلونو اړیکې وروسته په رسمي ډول کوژده وکړه. رونالډو دغه وړاندیز د یوې خورا قیمتي او سترې الماسي ګوتې په ورکولو سره کړی، چې په ټولنیزو رسنیو کې یې ګڼ غبرګونونه راپارولي دي.
د ارجنټاین-هسپانوۍ ماډلې، ۳۱ کلنې جورجینا روډریګز، د دوشنبې په ورځ په خپل انسټاګرام پاڼه د دې خبر پخلی وکړ. هغې یو انځور خپور کړ چې پکې یې خپل لاس د رونالډو پر لاس ایښی او د هغې په ګوته کې یوه ځلېدونکې او لویه الماسي ګوته ښکاري. هغې له انځور سره لیکلي: “هو، زه یې منم. په دې او زما په ټولو ژوندونو کې.”
د راپورونو له مخې، دغه ګوته خورا ارزښتناکه ده. د جواهرو پېژندونکو په وینا، د ګوتې ارزښت ښايي څو میلیونه ډالره وي او د الماس وزن یې له لسو څخه تر پنځلسو قیراطو پورې اټکل شوی دی. د جورجینا د ګوتې لویوالي سمدلاسه هغه له هغې ګوتې سره پرتله کړه چې جیف بیزوس خپلې مېرمنې لورین سانچیز ته ورکړې وه.
دا اعلان د هغو میاشتو اوازو ته د پای ټکی ږدي چې د دې جوړې د کوژدې په اړه خپرېدې. دوی په تېرو اتو کلونو کې د څلورو ماشومانو مور او پلار شوي او د یوه ماشوم د مړینې له سختې تجربې هم تېر شوي دي.
دوی لومړی ځل هغه مهال سره ولیدل چې جورجینا د ګوچي (Gucci) په یوه پلورنځي کې د پلورونکې په توګه کار کاوه او په ۲۰۱۷ کال کې یې خپله اړیکه په رسمي ډول پیل کړه. په همدې کال کې دوی د غبرګونو ماشومانو، ایوا ماریا او متیو، چې اوس اته کلن دي، او د خپلې لور، الانا، چې اوس اووه کلنه ده، هرکلی وکړ. په ۲۰۲۲ کال کې، دوی د دوو نورو غبرګونو ماشومانو تمه درلوده، خو له بده مرغه زوی یې د زیږون پر مهال له لاسه ورکړ او لور یې، بیلا، اوس درې کلنه ده. دوی د رونالډو د پخوانۍ اړیکې څخه د هغه د ۱۵ کلن زوی، کرېسټیانو رونالډو جونیر، پالنه هم په ګډه کوي.
د “زه جورجینا یم” په نوم په خپل نېټفلیکس پروګرام کې، جورجینا ویلي وو چې ملګرو به یې پرې ټوکې کولې چې ولې لا هم واده نه کوي، او هغې به په ځواب کې ویل، “دا زما په واک کې نه ده.” رونالډو هم په دې پروګرام کې ویلي وو چې هغه یوازې د مناسب وخت په تمه و. هغه زیاته کړې وه: “دا په یو کال، شپږو میاشتو او یا هم یوې میاشتې کې کېدای شي. زه زر سلنه ډاډه یم چې دا به کیږي.” هغه دا هم منلې وه چې په پیل کې یې فکر نه کاوه چې اړیکه به یې دومره پیاوړې شي، خو “یو څه وخت وروسته مې احساس کړه چې هغه زما د ژوند ښځه ده.”
د فوربز مجلې له مخې، ۴۰ کلن کرېسټیانو رونالډو د نړۍ تر ټولو ډېر عاید لرونکی لوبغاړی دی چې د ۲۰۲۴ کال له مۍ څخه تر ۲۰۲۵ کال مۍ پورې یې ۲۷۵ میلیونه ډالره ګټلي دي. هغه اوسمهال د سعودي عربستان د “النصر” کلب لپاره لوبه کوي.
