په ننګرهار کې ځایي سرچینې وايي چې د دغه ولایت یو اوسېدونکی د ترکيې د پوله ساتو ځواکونو د ډزو په پایله کې وژل شوی دی.
سرچینو پنجشنبه د سلواغې پر ۱۱مه تایید کړه چې دا ځوان د ترکیې په « اوران» سرحدي سیمه کې وژل شوی دی.
د سرچینو په وینا، دغه ځوان شهیدالله نومېده او د ننګرهار د روداتو ولسوالۍ اوسېدونکی و.
سرچینو زیاته کړه چې دغه ځوان غوښتل چې د ایران له لارې ترکیې ته ولاړ شي او بیا ځان اروپایي هېوادونو ته ورسوي.
طالبانو تر اوسه په دې اړه څه نه دي ویلي.
د یادونې وړ ده، چې له کلونو راهیسې هېوادوالو د بې وزلۍ او بې روزګارۍ له امله د سفر لاره غوره کړې او د یو شمیر هېوادونو د پوله ساتو ځواکونو او انساني قاچاق کوونکو د تاوتریخوالي قرباني شوي دي.
دا بهیر پر افغانستان د طالبانو له واکمنېدو وروسته، څو برابره زیات شوی دی.
