د طالبانو د زندانونو چارو د سمون اداره وایي چې د لوګر، بدخشان، لغمان، تخار او دایکنډي ولایتونو له زندانونو ۱۵۲ بندیان ازاد شوي دي.
د زندانونو د سمون ادارې نن (پنجشنبه، د سلواغي ۴مه) پر خپله اېکسپاڼه په یوه اعلامیه کې ویلي، د طالبانو د امیر د فرمان او سترې محکمې د حکم پر اساس د لوګر، بدخشان، لغمان، تخار او دایکنډي ولایتونو له زندانونو ۱۵۲ بندیان خوشي شوي او د ۱۸۶ نورو د بند موده کمه شوې ده.
سرچینې ویلي، د یاد شمېر کسانو له ډلې نهه کسان د لوګر له زندانه ازاد شوي او د ۲۶ بندیانو د بند موده کې تخفیف راغلی، د بدخشان له زندانه ۷۲ کسان ازاد شوي او ۳۶ نورو د بند موده کې تخفیف راغلی.
د دغه سرچینې د معلوماتو پر بنسټ، د لغمان له زندانه ۵۶ بندیان ازاد او د ۸۳ نورو د بند موده کمه شوې، د تخار له زندانه اووه کسان ازاد شوي او د ۲۱ نورو د بند موده کمه شوې او دغه راز د دایکنډي له زندانه اته کسان ازاد او د ۲۰ کسانو د بند موده کې تخفیف راغلی دی.
یادې ادارې وړمه ورځ هم ویلي وو چې د کندوز ولایت له زندانه ۴۲ کسان ازاد شوي دي. له زندانونو د زندانیانو د خلاصون لړۍ له تېرو څو ورځو راهیسې روانه ده.
