د ازبکستان د بهرنیو چارو وزارت اعلان کړی چې پرون د کب ۱۶مه په تاشکند کې د افغانستان لپاره د ازبکستان، ایران، چین، پاکستان، روسیې، تاجکستان او ترکمنستان د استازیو ناسته وشوه

په دې غونډه کې د افغانستان اوسني وضعیت، د دواړو لورو ترمنځ د همکاریو او اوږد مهالې سولې او ثبات د رامنځته کولو او د افغانستان له خلکو سره د بشردوستانه مرستو په اړه خبرې وشوې.

دا ناسته په داسې مهال کې تر سره کیږي چې تر اوسه د ګاونډیو هیوادونو په ګډون په نړۍ کې کوم هیواد په افغانستان کې د طالبانو نوی حکومت په رسمیت نه دی پیژندلی چې د پخواني شل کلن جمهوریت له نړولو وروسته یې جوړ کړی.

طالبان ټینګار کوي چې دوی د رسمیت پيژندلو لپاره د نړیوالو ټول شرطونه پوره کړي دي.

څه موده وړاندې هم تاشکند د افغانستان په اړه د یوې نړیوالې ناستې کوربه و

له دې ناستې پخوا د روان کال په زمري میاشت کې هم د ازبکستان په پلازمېنه تاشکند کې د افغانستان په اړه نړیواله ناسته ترسره شوي وه چې د اسلامي امارت د مقاماتو په ګډون، د شلو هېوادونو استازیو پکې ګډون کړی و.

نور ولولئ: د ازبکستان ملي امنیت سلاکار: افغانستان سره باید ښه تعامل وشي

په نوموړې ناسته کې هم د افغانستان د کړکیچ په اړه بحثونه د نظریاتو تبادلې شوې وې.

د ملګرو ملتونو امنیت شورا هم د افغانستان په اړه د ناستې تابیا لري

په افغانستان کې د ملګرو ملتونو دفتر یوناما هم هوډ څرګند کړی چې نن د کب په ۱۷مه به د ملګرو ملتونو امنیت شورا د افغانستان په اړه ناسته ولري چې د ملګرو ملتونو د عمومي منشي استازی به پکې خپلې څرګندونې وړاندې کړي.

تمه ده چې په افغانستان کې د بشري حقونو حالت او بشري ناورین به د دې غونډې اصلي محورونه وي.

ملګري ملتونه په افغانستان کې د بشري حقونو او د ښځو د حقونو په اړه اندیښنې لري چې په وار وار یې څرګندې کړې دي.

په افغانستان کې د تاوتریخوالي په اړه د ملګرو ملتونو اندیښنې

پر دې سربیره ملګري ملتونه په افغانستان کې د امنیتي حالت د خرابیدو په اړه هم اندیښمن دي چې په اړه یې د ملګرو ملتونو د بشر حقونو شورا ځانګړي راپور ورکوونکي ریچارډ بنت د ملګرو ملتونو شورا په ناسته کې په افغانستان کې د داعش اورپکې ډلې د بریدونو ډیروالي په اړه اندیښنه ښودلې وه.

خو طالبان وایي چې دوی په افغانستان کې د داعش ډله په بشپړ ډول له منځه وړې ده او بریدونه یې ورته شنډ کړي.