کابل کې بهرنیو چارو وزارت ته نږدې ځانمرګی برید شوی چې شپږ کسان پکې په شهادت رسیدلي او ۱۲ نور ټپیان دي
د کابل امنیه قومانداني وایي چې د کابل ښار په نننۍ چاودنه کې شپږو ملکي وګړو ژوند بایللی او د اسلامي امارت د دریو سرتېرو په ګډون یو شمېر ملکي وګړي پکې ټپیان شوي دي.
د کابل د امنیې قوماندانۍ ویاند محمد خالد ځدراڼ رسنیو ته په استول شوې خبرپاڼه کې ویلي چې دغه پېښه د دویمې امنيتي حوزې اړوند د ملک اصغر په څلور لارې کې امنيتي چيک پواينټ ته نږدې هغه مهال رامنځته شوه چې يو ځانمرګی بریدګر د امنيتي ځواکونو له لوري په نښه شو.
ځدراڼ زیاتوي، د بريدګر د وژل کېدو په پايله کې له هغه سره چاودېدونکو توکو هم چاودنه کړې ده چې له امله یې تر ۶ پورې ملکي کسان شهیدان او یو شمیر ټپیان شوي، په پېښه کې ۳ تنه مجاهدین هم ټپیان شوي.
په کابل کې اېمرجنسي روغتون هم ویلي چې د دوو ماشومانو په ګډون ۱۲ ټپیان او دوه مړي وروړل شوي دي.
د ویلو ده چې تر اوسه کومې وسلوالې ډلې د یاد برید مسؤلیت نه دی منلی؛ خو تر دې وړاندې د دې ډول بریدونو مسوولیت داعش ترهګرې ډلې منلی و.
په کابل کې د اروپايي ټولنې استازو دغه برید غندلی او ویلي یې دي چې:”د ټولو افغانان خوندیتوب باید ډاډمن شي”
نږدې دوې میاشتې وړاندې هم د بهرنیو چارو وزارت ته څېرمه ځانمرګی برید شوی و چې ډېر مرګ ژوبله یې اړولې وه
هغه مهال دوو مهمو سرچینو ویلي وو چې په نوموړي برید کې د ۱۴ ډیپلوماتانو په ګډون د بهرنیو چارو د وزارت ۱۸ کار کوونکي وژل شوي وو.
په وژل شویو کې داسې ډیپلوماتان هم وو چې په ډيپلوماتیکو ماموریتونو کې یې تر ۱۵ کلونو ډېره کاري تجربه لرله.
د یوې سرچینې په وینا “ځینو ډيپلوماتانو، په جرمني، یونان، هنګري، فرانسې او نورو هېوادونو کې کلونه کار کړی و او بېرته افغانستان ته ستانه شوي وو.”
نور ولولئ: کابل کې د پاکستان پر سفارت برید اسلاماباد د پېښې د څېړنې غوښتنه کړې
که څه هم طالب چارواکي د ډاډمن او هر اړخيز امنيت ډاډ ورکوي خو په دې ورستيو کې دا ډول بريدونه مخ پر زياتېدو دي.
په افغانستان کې د طالبانو له بیا واکمنېدو وروسته، داعش ډلې د کابل، کندهار، کندوز او مزار شریف په څېر نورو ښارونو کې مرګوني بریدونه کړي دي.
امریکا او ځینو نورو هېوادونو په افغانستان کې د داعش اورپکو په اړه اندېښنې بیا بیا په ډاګه کړي خو د طالبانو حکومت بیا ټینګار کوي چې داعش ډله یې په دغه هېواد ځپلې ده.
