په دې اعلامیه کې ټینګار شوی چې باید شته فرصتونه ضایع نه شي او له افغانستان ملاتړ وشي

د افغانستان لپاره د امریکا او د منځنۍ اسیا د پنځو هېوادونو استازو د افغانانو د ملاتړ او سیمه کې د ټیکاو او امنیت له پاره د امریکا او دغو هېوادونو ترمنځ د همکارۍ له شته فرصتونو څخه پر ګټې اخیستنې ټینګار کړی.

د امریکا د بهرنیو چارو وزارت د افغانستان په اړه د قزاقستان په پلازمېنه آستانه کې د قرغیزستان جمهوریت، تاجکستان، ترکمنستان، ازبکستان او امریکا د ځانګړو استازو د تېرې اونۍ د هغې ځانګړې غونډې اعلامیه بېګا (جمعه د اګست ۱۱مه) خپره کړې چې پکې پر سیمه د افغانستان د اوسني وضعیت پر اغېزونو او په دې اړه د دوی د همکارۍ پر فرصتونو خبرې شوې.

دا اعلامیه تېره شپه ناوخته خپره شوه

د قرغیزستان پلازمېنې دا غونډه د تېرې میاشتې وروستیو کې وشوه، خو د امریکا بهرنیو چارو وزارت د دې ناستې په هکله پرون ماښام اعلامیه خپره کړه.

نور ولولئ: افغانستان د ګاونډیو هیوادونو بهرنیو چارو وزیرانو غونډه؛ د طالبانو پلاوی ازبکستان ته تللی

په اعلامیه کې راغلي چې سیمه او نړیواله ټولنه اړ ده چې د داسې متحد، خپلواک، با ثباته او پر ځان بسیا افغانستان ملاتړ وکړي چې ترهګري پکې نه وي او د ښځو او نجونو په ګډون يې د ټولو وګړو حقونو ته درناوی کېږي او له ځان او خپلو ګاونډیو هېوادونو سره په سوله کې وي.

په دې غونډه کې نورو هېوادونو ته د تاوتریخجنې افراطپالنې او ترهګرۍ د صادرېدو، مالي ملاتړ او کوربه توب د مرکز په توګه د افغانستان د خاورې د کارېدو پر مخنيوي ټینګار شوی او د خلکو، وسلو او نشه‌يي توکو د قاچاق په مخنیوي کې همکارۍ هم اړتیا بلل شوې.

دې غونډه کې د افغانستان اقتصادي وضعیت جدي بلل شوی

د غونډې ګډونوالو په افغانستان کې بشري او اقتصادي وضعیت هم جدي بللی چې د نړیوالې ټولنې قوي او همغږي غبرګون ته اړتیا لري او په تېره بیا د بشردوستانه فعالینو لپاره يې د بشردوستانه اصولو، بې طرفۍ، او خپلواکۍ د اصولو په رڼا کې ټولو اړمنو افغانانو ته د بشرپالانو لاسرسی اړین بللی.

په غونډه کې ټینګار شوی چې د باثباته، اقتصادي پلوه ډاډمن او سوله ییز افغانستان هدف یوازې هغه وخت ترلاسه کېدی شي چې د ښځو او نجونو په ګډون ټول افغانان او د توکمیزو او مذهبي اقلیتونو په شمول ټول افغانان وکولای شي په بشپړ، مساوي او معنادار ډول د هېواد په ابادۍ کې برخه واخلي. دغه راز يې د هیواد د سیاسي راتلونکي په اړه د ډیالوګ د یوې ټولشموله پروسې اړتیا ته اشاره کړې چې د نورو چارو تر منځ حساب ورکوونکې او استازندویه حکومتي ادارې جوړې کړي.