د طالبانو لوړ پوړی چارواکی د ښځو زده کړې واجب بولي، خو پوره دوه کاله کېږي چې نجونې له زده کړو راګرځول شوي
د طالبانو د بهرنیو چارو وزارت سیاسي معین عباس ستانکزی وايي، پر اسلامي حکومت او چارواکو ښځو ته د زدکړو زمینه برابرول واجب دي.
نوموړي د ښځو اړوند غونډه کې زیاته کړه، اسلام د شریعت په رڼا کې ښځو ته د زدکړو او میراث حق ور کړی دی.
نور ولولئ: د ښځینه زدهکوونکو انتظار ته ځواب شته؟
ښاغلي ستانکزي تر دې مخکې هم بیا بیا نجونو ته د ښوونځیو او پوهنتونونو د پرانیستو غوښتنه کړې ده.
هغه دا خبرې په علومو اکاډمۍ کې وکړې
په دې غونډه کې د افغانستان علومو اکاډمۍ مشر فریدالدین محمود هم وویل، د اسلام د پېغمبر مېرمنو د ښځو د لارښوونې، زدکړو او ستونزو په حل کې ونډه درلوده.
د ښځو اړوند غونډه د چارشنبې په ورځ علومو اکاډمۍ کې جوړه شوې وه او پکې ځینې طالب چارواکو په کار او زدکړو کې د ښځو پر رول خبرې وکړې.
نور ولولئ: کمپاین کوونکي د ښځو د تعلیم مخنیوی غیر اسلامي بولي
د طالبانو د سوداګرۍ وزیر نورالدین عزیزي په دې غونډه کې وویل، ښځو په «جهاد» کې هم ونډه درلوده او هیڅوک هم په ټولنه کې د ښځو له رول او اهمیت انکار نشي کولی.
د طالبانو د ازموینو ادارې مشر عبدالباقي حقاني وویل، د علم زدکړو پر ټولو فرض ده او ټینګار یې وکړ: «موږ په علمي برخه کې تر نړۍ شاته یو.»
دوه کاله کېږي چې د ښځو پر زده کړه او کار بندیز لګول شوی
پر افغانستان د طالبانو دوه کلنه واکمنۍ کې له شپږم ټولګي پورته د نجونو ښوونځي تړلي دي.
که څه هم ځینې طالب چارواکي او د پوهنتونونو استادان پر دې حالت نیوکه کوي، خو نور طالب چارواکي وايي، چې د دې ستونزې حل د دوی د مشر په پرېکړه پورې تړلي دي.
پر دې سربېره د نړۍ بېلابېلو هېوادونو، نړیوالو سازمانونو او بشري حقوقو سازمان او نورو بار بار له طالبانو غوښتي چې نجونو ته د زده کړو اجازه ورکړي، خو له دې سره سره بیا هم طالبانو د نجونو زده کړو ته اجازه نه ورکوي او نه یې هم ددې لپاره کومه ځانګړې برنامه تر لاسه لاندې نیولي ده.
