د اسراییلو کابینې غزې ته هره ورځ د تېلو دوو ټانکرو ننوتو ته اجازه ورکړه او دا پرېکړه یې وکړه
د جګړې لپاره د اسرائیل ګومارل شوې کابینه وايي، دوی به هره ورځ دوو لاریو ته اجازه ورکوي چې په غزه کې د مرستو چارو دوام لپاره ملګرو ملتونو ته تېل ورسوي.
یو اسرائیلی چارواکی وايي، تیل به غزې ته اوبو رسولو او چټلو اوبو ایستلو کې ”حداقل ” مرسته وکړي. یوه امریکايي چارواکي بیا ویلي، ډېری تېل به د مرستو رسولو کې کارول کېږي، خو یوه برخه به یې د انټرنېټي او مخابراتي خدمتونو لپاره هم کارول کېږي.
نور ولولئ: اسراییل-حماس جګړه؛ اسراییلو ځواکونه الشفا روغتون ته ننوتل
د امریکا متحدو ایالتونو په بهرنیو چارو وزارت کې یوه چارواکي بي بي سي ته په دې هکله معلومات ورکړل چې څنګه اسرائیل غزې ته د یو څه تېلو لېږدولو هوکړه ومنله. د امریکا بهرنیو چارو وزارت لپاره د بي بي سي خبریاله باربرا پلیټوشر په خپل رپوټ کې د دغه امریکايي چارواکی له قوله وايي، اصولاً څو اونۍ مخکې پر داسې یوه میکانیزم هوکړه شوې وه، چې په غزه کې د وېش لپاره به تېل رفح زېرمې ته پرېښوول کېږي.
دا وړاندیز مخکې ولې نه عملي کېده
خو اسرائیل د دوو دلیلونو له مخې د دې هوکړې عملي کول ځنډولي وو: لومړی دا چې دوی امریکایانو ته ویل چې په سویلي غزه کې اوس هم تېل شته او دوی انتظار کاوه، چې ښايي د یرغمل شویو کسانو پر سر ښايي یوه هوکړه وشي.
خو د چهارشنبې پر ورځ د امریکا بهرنیو چارو وزیر انتوني بلېنکن د اسرائیل ستراتیژیکو چارو وزیر روت دیرمیر ته ټیلیفون وکړ، وخت راورسېد، تېل ختم شوي او په غزه کې د بشري ناورین مخنیوي لپاره باید سملاسي اقدام وشي.
نور ولولئ: د اسراییل-حماس جګړه؛ غزه کې الشفا روغتون خدمات نه شي وړاندې کولی
پر پنجشنبه بیا هغه د اسرائیل اپوزېسیون مشر بینې ګانتز ته ټیلیفون وکړ، چې په خپل هېواد کې د بېړنیز وضعیت ملي وحدت حکومت غړی دی. دا مهمې مذاکرات وو او له هغه وروسته د اسرائیل جګړې لپاره ګومارل شوې کابینې د تېلو لېږد اجازې ورکولو رایې ورکړه.
امریکا او غزې ته د مرستو رسولو هڅې
د امریکا بهرنیو چارو وزارت چارواکی وايي، امریکا به د تېلو کچې زیاتولو لپاره فشار روان وساتي.
بل لور اسرائیل پوځ ویلي، غزې ته د مرستو لېږدونکو کاروانونو ‘وړتیا ‘ زیاتوي او په وینا یې په دې کاروانونو کې د شاملو لاریو پر شمېر به هیڅ ”محدودیت ” نه لګوي. د اسرائیلي پوځ په یوه اعلامیه کې په دې هکله ویل شوي: تر هغه ځایه چې اړتیا وي، اسرائیل به د بشری مرستو کاروانونو وړتیا او لاریو شمېر زیات کړي.
د یادونې وړ ده چې پر غزه د اسراییلو به بریدونو کې ګڼو ولسي خلکو ته چې اکثره یې ښځې او ماشومان دي، مرګ ژوبله اوښتي ده او تېره ورځ د اسراییلو لومړي وزیر نتنیاهو هم ومنله چې ځواکونه یې په ولسي مرګ ژوبله کې رول لري او په نخنیوي کې یې پاتې راغلي.
